GIINGONG anaa lamang sa upat ka mga money investment schemes ang “legit” kun lihetimo sa Tagum City gikan sa 30 ka mga kompanya nga naghanyag og dako nga tubo sa salapi.
Subay sa gibutyag gikan sa kasaligan nga impormante nga Biyernes sa gabii, Mayo 24, 2019 ang Criminal Investigation and Detection Group (CIDG) national office, miadto sa Tagum City aron imbestigahan ang 30 ka mga money investment companies.
Gibutyag sa report, nga alas 8:40 sa gabii, sa susamang adlaw, migula sa imbestigasyon nga upat lamang ka mga money investment company ang nakatuman kinsa nakapakita og mga resikitos aron sila lihetimo nga makapadagan sa ilang patigayon.
Ang upat ka giingong mga 'legit' wala una gipanganlan sa publiko subay sa pagpa-hold niini sa otoridad sanglit nagpadayon ang ilang pag-verify sa mga papeles nga ilang napakita.
Giingon nga ang wala nakapakita og mga papeles, gihatagan sila sa otoridad og usa ka semana aron tumanon ang gipangayo nga mga permits alang sa ilang legalidad.
Una niini, gibutyag sa Tagum City Police Station nga ilang natala ang zero-crime-incidence sa siyudad sukad mikusog ug nanggula ang mga money investment schemes sa maong dakbayan.
Sa bahin ni Tagum City Mayor Allan Rellon, dili niya ipaundang ang operasyon hangtod walay mando ang korte, hinuon motabang si Rellon nga protektahan ang mga investors pinaagi sa paghatag og seguridad ngadto kanila.
Dugang pa nga walay nahitabong krimen sa dakbayan sa Tagum gikan sa election period gumikan sa mga natigayong “pay in” ug “pay out” sa siyudad.