ANG PASPAS card nga programa ni Cebu City councilor-elect Niña Mabatid mapahimuslan pa sugod sa Hulyo 1, takdo sa iyang paglingkod sa konseho.
Si Ramil Ayuman, kagawad sa Barangay Apas, kinsa wala gipalad sa pagka konsehal sa north district, nagkanayon nga adunay mga tawo nga niadto sa Malasakit Center sa Vicente Sotto Memorial Medical Center (VSMMC) aron mopahimulod sa Paspas Card diin adunay free hospitalization.
Ang kasayuran ni Ayuman nagagikan sa personnel sa Malasakit Center sa VSMMC.
Matod ni Ayuman nga gumikan kay walay pundo ang Paspas Card ni Mabatid, gisawo kini sa Malasakit Center para malibre ang pagpatambal.
Ang kasamtangang kapitan sa Barangay Mabolo niluwat og pamahayag human akadawat og mga pagsaway gikan sa mga tawo og mismo sa iyang kauban sa pagdagan sa miaging piniliay.
“This is a personal program of City Councilor Niña Mabatid. This will take effect on July 1, 2019. Just stay on my page for updates and do not listen to those people who have no absolute right to discuss my program. Move on!,” pagpasabot ni Mabatid sa iyang Facbook page.
Ang Paspas card ni Mabatid nga maoy iyang gigamit sa pagpangampanya sa kapin 325,577 ka botante sa north district adunay libreng pagpaospital, legal assistance, kasal, job opportunity sa local, no placement fee para abroad ug health card.
Si Elsa Pasquite, personal secretary ni Mabatid, niingon nga kaugalingong kwarta sa councilor-elect ang gamiton sa iyang mga programa sama sa iyang gibuhat sa Mabolo.
Ang mga tawo nga adunay mga health card makabenepisyo og P10,000 matag tuig sa higayon nga sila ma-ospital dugang ni Pasquite
Hangtod sa pagsuwat ning balita, wa pa masuta kon pila ka mga health card ang nahatag ni Mabatid sa mga voter.
Ang labing dako mga proyekto ni Mabatid mao ang iyang gitawag og Supermarket Cooperative nga karon napahimuslan na sa dul-an libuan ka mga tawo sa Mabolo.
Si Mabatid niingon mga ang maong Supermarket iyang ipatukod usab sa mga dagkong barangay sa north district hangtod malukop ang mga barangay sa distrito diin mapalit ang mga baligya sa presyo nga ubos pa sa grocery sa mall.
Ang mga miyembro adunay tag P15 nga dues matag buwan.
Ang programa ni Mabatid nagsugod sa Mabolo ug maoy iyang gigamit isip plataporma ug nisaad nga palapdan para ngadto sa ubang mga barangay gani siya gitawag sa Barug PDP-Laban nga inahan sa north district. (PAC)