PATAY ang drayber sa usa ka motorsiklo human nibangga sa jeepney nga puno og pasahero gikan nangaligo og dagat sa Barangay Simala, lungsod sa Sibonga niadtong Sabado sa hapon, Mayo 25.
Ang biktima nga gideklarar nga dead-on-arrival (DOA) sa tambalanan giila nga si Ronnie Alegado Quilaton, 49, taga Sitio, Balandia Guiwanon, lungsod sa Argao.
Matod ni Police Master Sergeant Eduardo Semilla, imbestigador sa Sibonga police station nga hubog nga nag padagan sa iyang motor ang biktima.
Giingong nag ikis-ikis na kini nga nagpadagan sa motor ug didto nibanga sa jeep nga gimaneho ni Gerson Tanghian, 28, nga taga Cansojong Talisay City nga adunay plate number GXV 352.
“Kining Mitsubishi gikan sa Dalaguete nangaligo mopauli na unta paingon sa Talisay, Pag-abot sa Simala kining motor nga gikan sa sitio Dumlog Simala nagdagan nga sugat nga nag zigzag murag hubog sumala sa doctor,” mtod ni Semilla.
Wala na mo kiha ang mga kabanay sa biktima kay giingong nasayod sila nga hubog kini nga nag maneho sa iyang motorsiklo.
Ang drayber nga si Gerson Tanghian gibuhian ra usab dayon sa mga police sa Sibonga tungod sa wala na pag reklamo sa mga kabanay.
“Dili man agrabyado ang pamilya sa namatay kay although wala may sala ang jeep nihunong man gani ni siya midam-og niya ang motorsiklo ang tagtungod dili na mo file og kaso," dugang ni Semilla. (AYB)