NIGAHIN og dugang P3.7 milyones ang Cebu City Government para sa pagpalit 1,500 ka ga sakong bugas humay para sa mga Angkas ug habalhabal driver sa dakbayan sa Sugbo.
Si Konsehal Margarita Osmeña kinsa anaa na sa iyang katapusang termino nipalabang og resolution para magamit ang maong kantidad nga adto kuhaon sa pundo gikan sa Philippine Amusement and Gaming Corporation (Pagcor) nga giaprobahan sa konseho.
Una niini, si Delfin Adolfo, officer in-charge sa Two-wheeled Motor Vehicle Monitoring, Coordinating, and Assistance Unit (TMV-MCAU) nipadala og suwat ngadto ni outgoing Mayor Tomas Osmeña niadtong Marso 15 niining tuiga para sa 1,500 ka mga Angkas ug habalhabal driver nga kaniadto apektado sa temporary restraining order (TRo) sa Supreme Court kabahin sa ilang pagpamasahero niadtong Agusto 2018.
Si Osmeña una rang nipalit og 6,000 ka sakong bugas balor og P15 milyones sayo niining tuiga para sa 6,000 ka mga drayber nga giingong apektado ang ilang pagpamasahero.
Ang pagpalit sa libuang ka sakong bugas gisaway ni Konsehal Pastor Alcover Jr, nga iyang gihulagway nga gigamit ni Osmeña aron iyang makuha ang boto sa mga habalhabal driver sanglit niadtong higayona nag angat ang piniliay.
Si Alcover nipalanog pa sa iyang previlege speech ug gipangayoan og lista ang executive department apan hangtod karon walay nadawat mga lista ang buhatan sa konsehal kon si kinsa ang mga nakadawat sa maong bugas.
Ang bugas nga gipalit sa City Government nagkantidad og P2,500 matag sako diin usa ra ka bidder ang nisalmot atol sa bidding proper niadtong buwan sa Pebrero.
Niadtong Pebrero 23 ning tuiga, ang City government nanghatag og 2,000 ka sakong bugas sa habalhabal ug Angkas drivers.
Ang unang requirements aron makakuha sa bugas naglakip sa photocopy sa driver’s license, voter’s certificate, ug certificate of ownership sa motosiklo o iyang Land Transportation Office (LTO) registration.
Si outgoing Mayor Osmeña nipahibalo niadtong Disyembre 2018 sa iyang hukom sa paghatag og bugas isip 'emergency assistance' sa habalhabal (motorcycle-for-hire) ug Angkas drivers nga naapektohan sa hukom sa Supreme Court sa pagsuspenso sa operasyon sa Angkas sa nasod.
Hinuon, gitun-an karon ang pagpabalik sa Angkas operation.