Obenieta: Hagit sa mga hulmigas

KON hain ang tam-is, adto pod ang mga utitod. Pastilan, pagkapait kon kining sanglitanan ikatandi pod sa kinaiya sa kasagaran natong mga botante.

Karon nga ang kalamay sa pangampanya pilit na kaayo samtang gasingabot ang piniliay, dayag nga ganahan gyud ang mga k andidato nga sila tapukan. Patuyang gyud sila’g palami. Kinahanglang madani sa ilang kisaw ang katawhan. Pinaagi sa latik sa lingaw-lingaw, sayon ra kaayo nila ang pagbulit sa dunggan ug tabon-tabon sa ilang tigpaminaw.

Aron dili intawon langawon ang ilang pagpadayag kon nganong angayan silang saligan, paukyab dayon sila og mga pasundayag. Pasikat gyud duyog sa ilang mga celebrity endorsers. Hugyaw taman sa ginhawa diha sa entablado.

Bitaw, wala’y bag-o sa gibuhat sa Nacionalista Party (NP) atol sa ilang rally sa Sugbo bag-ohay lang.  Ariba sila uban sa mga artista. Ambot lang kon ang ilang plataporma wala ba pod kaha’y kalainan sa usa ka salida, layo ra sa tinuod.

Hinuon, dili baya ang NP ra mao’y gabuhat ini kay sagad mao man pod na’y gawi sa ubang partido sa mga nilabay nga mga piniliay. Kinsa ma’y kandidato nga hingpit ang baruganan sa pagtuo nga ang iyang kaligdong, kaalam, ug katakos igo nang tambongan sa kadaghanan?  

Kon si Mayor Tomas Osmeña mao’y pangutan-on, dili na kuno kinahanglan ang mga kalingawan. “No movie stars, no variety show…” Kini mao’y gikatahong laraw ni Osmeña kabahin sa panagdugok nga pasiugdahan sa mga kaanib sa Bando Osmeña Pundok Kauswagan (BOPK) alang sa nasudnong kandidatora sa Liberal Party.

“We’re not going to have any kind of gimmick, no Wowowee. It will just be a straightforward gathering to allow Mar and Noynoy to communicate directly to the people.”

Aber, tan-awon nato kon mosalir ba ning ilang laraw nga lunlon mga pulong ra ilang itagana. Ambot og dili ba magyango-yango ang ilang tigpaminaw samtang dukaon ug dagiton sa ilang alimungaw.

Bitaw, makita gyud ang katag kon duna na ba’y sarang kahiamgo ang atong mga botante lakip sa kahamtong sa pulitikanhong kahibalo. Nindot unta nga masuta ang kinaadman sa mga botante—lantip sa mga hilisgutan kabahin sa katilingbanong kaayuhan, ug wala magkinahanglan sa kidhat-kidhat ug kundat sa pamulitika.

Kon pasagdan kining mga mga pakitiw-sa-tiil nga pangampanya, tataw nga gapamatuod kini uyamot sa ubos nga pagtan-aw sa mga pulitiko natong mga botante: mabaw og kigol, suwawan dayon sa kidlap nga taphaw.

Katam-is palandungon duyog sa paglaom nga makat-on na unta kitang mga botante pagpataas sa atong kahimatngon. Kon padayon ra tang yatakan sa naandang kiat sa mga kandidato, lami unta kon magtiwas ta pagkat-on unsaon pagkitkit sa panimalos sama sa hulmigas.

r

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph