WA PA gani makapanumpa sa ilang tagsa tagsa ka bag-ong katungdanan nagpakita na og maayong labok sila si in coming Cebu Governor Gwen Garcia og in coming Cebu City Mayor Edgar Labella. Kini mao ang makasaysayanon nga tigum niadtong Sabado nga gitambongan sab sa mga bag-ong napili nga opisyales sa probinsiya ug siyudad. Kauban ni Sec. Michael Dino gituki ang daghang isyu. Naglaum kita nga mamunga og maayo ang ingon niini nga inisyatiba sa atong mga lider.
Sa akong kasinatian isip beat reporter kaniadto sa kapitolyo, city hall sa Cebu , Mandaue ug Lapulapu kong mag-iyahay ang mga lider ning maong mga LGU, wa gyuy maayong paingnan. Sa isyu sa trapiko angay nga pahimug-atan ang paglakip sa mga local chief executives sa mga local government units sa mga siyiudad ug lungsod diin kanunayng masinati ang problema sa trapiko.
Di na siguro angay nga hinganlan kong asa ning mga dapita, klaro ug tataw kaayo nga ang maong problema nagkinahanglan og hiniusang puwersa aron kini maminosminosan kong di man gani hingpitnga masulbad. kay kong mag-iyahay gud sama sa sitwasyon karon wa gyuy maayong padulngan. Pila na lang baya ka adlaw ang paaboton magsugod na ang klase.
Di pa uwahi ang tanan. Ang pagdemanda og disiplina gikan sa mga driver og kugi gikan sa mga traffic enforcer plus maayong sistema gikan sa mga tagdumala moresulta og mas hapsay nga bul-og sa trapiko. Di hinuon nato isalikway ang kamahinungdanon sa abag sa publiko ug barangay aron makab-ot ang atong tuyo. Bisan ang mga tag-iya og sakyanan, private use man o dili angay nga magpakabana kanunay sa ilang responsabilidad.
Nganong maaberya ang dyip unya anha pa gyud sa tunga sa karsada, posibli nga nagpabya ang operator sa tukma nga maintenance. Asa man diay padung ang inadlawng abang sa driver? Di pa ni mao. Ang pagpataka og parking. Gipalapdan ang karsada pero gihimo ra man. sab nga parkinganan. Gawas sa trapik, unta di makalimtan ang isyu sa supply sa tubig. Pwerteng paita.
Ning panahon nga nasinati ang mild El Niño gipahinumduman kita nga kong duna pay mas labaw niini unsain nalang. Mao bitaw nga atong tambagan kadtong nangita og kapuy-an. Susiha una kong duna bay maayong supply sa tubig ang dapit nga gusto ninyong balhinan og puyo. Bahala na og layo sa merkado ug eskwelahan .
***
Salamat Noy Marcos Navarro Sacol sa pagpaambit sa imong kaalam sa natad sa panuwat ug pagderiher og mga teleserye. Sa hinapos nga bahin sa dekada otsenta, nasurprisa ko nga nakakita sa akong manghod nga si Niki nga nahimong artista sa teleserye nga si Goat da Wanderpol. Siya kadtong engkantada nga naghimong gwapo sa usa sa mga aktor diin ang nagdala sa maong papel mao si Dr. Charles Nadela nga tua na magpuyo sa America. Kadyot ra ang maong role pero halandumon kaayo sa pamilya.