GIPASAR sa House of Representatives niadtong Lunes, Mayo 20, sa final reading ang House Bill 8961, nga maghimong mandatory sa Reserve Officers’ Training Corps (ROTC) alang sa mga tinun-an sa Grade 11 ug 12 sa mga publiko ug pribadong eskuylahan.
Ang Senate version naa pa sa committee level. Apan si Undersecretary Alain Pascua sa Department of Education (DepEd) masaligon nga mapasar sa Senado kay daghang mga senador ang nipaluyo niini.
Kon mpasar sa Senado ang maong balaudnon sa di pa ang Hunyo 7, moagi kini sa bicameral conference ug isumitir ngadto sa pangulo. Kon maaprobahan sa pangulo, mahimo kining ipatuman sugod karong tuiga, matod pa ni Pascua.
***
Ang mandatory ROTC program giwagtang ni kanhi Presidente Gloria Macapagal-Arroyo niadtong 2002 nunot sa pag-murder sa usa ka tinun-an sa University of Santo Tomas nga nibutyag sa mga anomaliya sa iyang ROTC unit.
Giaprobahan niya ang Republic Act No. 9163, ang National Service Training Program (NSTP). Makapili na ang mga estudyante sa usa sa mga components niini - ang ROTC, ang Civic Welfare Training Service ug ang Literacy Training Service.
Makalikay na sab ang mga estudyante sa pagmartsa nga magbuwad sa init sa adlaw samtang magpas-an sa replica sa riple o pusil-pusil nga kahoy.
***
Si DepEd Secretary Leonor Briones nipaluyo sa pagpabalik sa ROTC kay mao kini ang “first line of defense” sa Pilipinas ug makasilsil og disiplina ug patriotismo sa mga estudyante. “We cannot be relying on other countries to defend us...external assistance takes too long to arrive so we have to rely on ourselves,” matod pa niya.
Matod pa ni Briones, lakipan na ang ROTC og mga leksiyon sa kasaysayan, nasyonalismo ug proteksyon sa nasud. Kon mahibalik man ang ROTC, maayo unta nga di mobalik ang mga abuso nga nasinati sa mga kadete sa una.
Si Cebu Provincial Youth Commission executive director Charlton James Canoy niingon nga kinahanglang monituron sa eskusylahan.