ANG yaweng pulong sa hingpit o dinaliang kasulbaran sa mga nag-unang problema sa Metro Cebu ug alang sa kalamboan sa tibuok Sugbo, lakip sa mga isla nga sakop sa lalawigan, mao ang koordinasyon. Ngano? Ang tanang problema nga iyang giatubang konektado sa matag sa local government unit (LGUs).
Pananglitan, ang trapiko. Mas mapahan-ay, paspas ug nindot tan-awon kon dunay hiniusang inprastraktura sa pagsulbad sa kahguot sa trapiko karon. Samot na ang problema sa baha ug basura. ang agos o agianan sa tubig mitagos kini sa daghang LGUs. Dili epektibo ang gihimo nga pagpanglimpyo sa kasapaan sa usa ka LGU kon ang iyang silinganang LGUs wala mopatuman niini.
Bisan sa pagpatuman sa seguridad ug ubang plano sa kalamboan importante ang konsiderasyon o pagkuha sa ilang habig sa matag LGUs sa pagtunhay sa kahiusahan, kabahin gihapon kini sa koordinasyon sa liderato. Apan tungod sa subra nga pamulitika, wala kini mahatagi og gibug-aton. Nag-iyahay. Nagpataasay sa ilang garbo.
Ug maayong sinyales ang sayong gipakita nga panaghiusa nila ni Cebu Gov-elect. Gwen Garcia ug Cebu City Mayor-elect Edgardo Labella. Ang dakbayan sa Sugo dunay dakong papel ug impluwensiya isip ulohang dakbayan sa lalawigan. Hinuon, mayoriya sa mga mayor ug mga kongresista sa Sugbo kaalyado usab ni Gwen. Bentaha sa umaabot administrayson sa Hulyo 1.
Nakasuway na ang Sugbo ni Gwen isip gobernador. Nasayod kita nga kaagresibo sa tanang aspesto sa kalamboan labi na sa arte ug turismo nga usa sa nag-unang nagtimon sa pagtuyok ug kasadya sa ekonomiya sa Sugbo. Uban sa igong koordinasyon, walay pagduhaduha masakmit og balik sa Sugbo ang korona isip numero unong lalawigan sa nasod.
Ang koordinadong lihok mopatunhay sa kahiusahan ug mas plansadong pagpatuman sa bisan sa unsang kalihokan ug proyekto alang sa publiko. Pamulitika ipadaplin na. Padayon.