SUPERBALITA CEBU

Sugilanon: Ang bilyako kong lolo

FRED NUNEZ CANETE

Alegria, Cordova, Cebu

Ambot, kinsay angay basulon aning perming panag-ergo nilang Lola Cita ug Lolo Pedo? Si Lola ba nga puwerti kaselosa o si Lolo nga kon moporma, abi mog ulitawo ug batan-on pa gihapon.

Parehong tigulang na kining akong mga apuhan. Sitenta na si Lolo Pedo, hasta si Lola Cita. Apan lagi, kanunay lang silang mag-away. Ug ang hinungdan mao ang pagka palikero ni Lolo Pedo. Kana, kon si Lola Cita ang pasultion ug pahukmon.

Pero sud na karon sa pipila ka bulan, wa koy namatikdan nga dunay uyab si o kerida si Lolo. Nia man sila mopuyo sa amoa; gikuha nilang Mama Delia ug Papa Claudio. Gusto sa akong inahan nga maatiman ug mabantayan ang mga tigulang na niyang ginikanan. Lagi, wa koy namatikdan nga uyab o babaye nga gibirig-birigan ang apuhan kong lalake. Aw, sa akong pagtuo, duna pay mosugot kang Lolo kon magpabuang-buang. Guwapo kining akong apuhan bisag tigulang na. Unya angayan pa mamiste. Kinaham ang ‘long-sleeve’ nga dentro; ug di kawad-ag ‘shades.’

Ang akong namatikdan mao nuon ang pagka selosa ni Lola Cita. Way babaye nga makaduol-duol kang Lolo Pedo, dayon kinig mug-ot, unya magsapot ang buot tungod sa iyang kaigihan. Unya, si Lolo Pedo ang hungawan. Pero si Akang, ang among kusinera nga daginuton intawon og hitsura, napagan pa gyud sa ka-abubhoan ni Lola Cita. Gipa-putbol niya kang Mama Delia. Kuno, naibog kang Akang si Lolo Pedo.

USA ka buntag gitawag ko ni Delia. “Jodel, ubani silas Lola ug Lolo nimo sa Opon. Naay ilang paliton,” matod ni Mama Delia. Misalig sila nako kay dose anyos na man ko ug kanunay na sad kong kaadto sa dakbayan sa Lapu-Lapu.

Sa dyip nga among gisakyan nagtupad mi pagpanglingkod si Lola, unya si Lolo. Puno ang dyip, pero kasakyan pag usa ka pasahero. May mipara. Maanyag nga babaye ug batan-on pa. Abtik nga mihatag og lugar si Lolo, maong nakalingkod ang babaye tupad niya. Sikit kaayo ang ilang kahimtang. Kalit nga mimug-ot ang nawong ni Lola Cita. Tingalig nasudlan na sa bakukang sa pagka abubhoan ang iyang kahiladman. Pero si Lolo patay malisya lang. Mora lang kunohay nga wa kaalinggat sa katahom sa binuhat nga diha sa iyang kiliran.

Unya nakita ko nga morag nagduka si Lolo. Ambot ngano, nga buntag pa man sayo? Basta anam-anam nga midungoy ang iyang ulo. Miduko. Unya panagsa mohanag kadusmo. Abi kog nahitagpilaw siya samtang nagdagan ang sakyanan. Apan akong nalilian sa kilid sa iyang ‘shades’ nga nagsiga ang iyang kalimutaw. Wa mamilok nga mitutok sa puti ug bigot kaayong paa sa babaye nga nag-shorts lang diha sa iyang tupad.

“PARA! Dinhi ra mi!” Naigpot dihang kalit misinggit si Lola Cita.

“Nga-nganong manganaog na man ta, Day Cita?” ni Lolo nga kunohay nakamata ug natingala.

“Unsay ngano? Balik tas Cordova! Adto ta ‘magtiwas’ didtos ato!” ni Lola Cita nga siga na kaayog mga mata. Nagburot-burot sa pinugngan nga kalagot ang limugmogan sa apuhan kong babaye. Nakakita sad diay siya sa diskarte ug estratehiya sa bilyako nakong Lolo. (KATAPUSAN)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph