NOTADO ug idlas nga tulisan ug kawatan sa Dakbayan sa Mandaue, kinsa sulod na sa halos duha ka bulan nga gipangita sa kapulisan, ang nasikop sa Subangdaku pulis pinaagi sa buy-bust operation.
Samtang laing 31 pa ka mga tawo ang nasikop atol sa gipahigayon nga localized synchronized enhanced managing of police operations (Sempo), sa Mandaue City Police Office (MCPO), niaging tapos sa semana.
Sulod na sa dul-an duha ka bulan nga giangkon sa pangulo sa MCPO nga nahimo nila nga problema ang mga nahitabo nga pagpanulis sa mga pipila ka establisimento, gawas sa tulis sa mga pampubliko nga sakyanan, sa maong siyudad.
Niadtong Abril 30, 2019, nasikop sa mga pulis sa MCPO ang tulo ka mga gitudlong manulis sa mga establisemento, sama sa mga spa, salon, burger shop ug uban pa, diin matud sa director sa MCPO nga si Police Colonel Julian Entoma nga ang pangulo niini ang usa ka giila nga Johnny Danuco.
Niadtong Biyernes sa kaadlawon, Mayo 24, atol sa gipahigayon nga buy-bust operation, sa Subangdako Police, sa may Mantawi drive, sa Barangay Subangdaku, nasikop si Danuco, 35-anyos.
Nakuha gikan kang Danuco ang siyam ka pakete sa gituohang shabu.
Lakip sa nasikop ang kauban niini nga si Joseph Abasolo, 36, taga Barangay Agus, Dakbayan sa Lapu-lapu, human kini nakuhaan og 9mm nga kalibre sa armas.
Apan hugot nga gihimakak ni Danuco nga usa siya ka tulisan, ug gani gihimakak usab niini ang nakuha nga mga illegal nga drugas, atol sa buy bust.
Pangangkon ni Danuco, nga sa niaging tuig lang siya naabot sa Barangay Jagobiao, Dakbayan sa Mandaue, gikan siya sa Caloocan ug sa pag-abot sa maong syudad nanginabuhi isip habal-habal driver.
Pamasangil niini nga kalit lang giinitan siya sa mga pulis sa Basak police station, hinungdan nga gisikop siya ug napriso tungod sa paghupot og armas, niadtong Enero.
Nakapyansa ra usab dayon kini.
Dugang pangangkon niya nga dili sa buy-bust operation sila nasikop kundili sa checkpoint, matud niya nga gikan siya ug si Abasolo sa Barangay Pasil, sa Dakbayan sa Sugbo, sa dihang naagian nila ang checkpoint, ug didto na nasikop.
Hinuon si Abasolo ang niangkon nga iya ang armas, nga giingong hinulman gikan sa laing amigo ni Danuco.
“Hindi akin yan, dun sa presento tres (Basak police station) napag-initan lang ako, hindi ko alam kung bakit, dalawa kami inaresto, nilagyan ako ng armas. Hindi ko alam yang mga bintang nila sa akin,” panghimakak ni Danuco.
Apan si Abasolo sa iyang bahin niangkon nga aduna unta silay tirahon sa Barangay Pasil, human giingon nga gi-‘tumbling’ ang ilang kwarta, kon wa nadawat ang buot nga ipapalit.
Giangkon ni Abasolo nga sila ni Danuco ang mogamit og drugas, apan dili mamaligya. Wala usab matud pa siya masayod sa giingong’ pagka-tulisan ni Danuco.
Apan matud ni Entoma nga si Abasolo ang giingon nga usa sa mga kauban ni Danuco sa pagpanulis, lakip na sa Dakbayan sa Lapu-Lapu ug sa ubang parte sa Dakbayan sa Sugbo, ug silingan nga lungsod.
Dugang ni Entoma nga ang tulo ka mga lalaki nga nakuhaan og armas atol sa checkpoint sa Centro Police niadtong Huwebes sa gabii, Mayo 23, sila si Marlon Batoon, 23, taga Dakbayan sa Danao; Roel Jumao-as, 27, taga lungsod sa Carmen; ug si Roque Alburo, kinsa pareho nakuhaan og 38 kalibre nga mga armas.
Sugod niadtong Huwebes, hangtud Lunes sa kaadlawon, Mayo 27 matud ni Entoma nga wala nay natala nga tulis o insidente sa kawat sa syudad.
Kahinumduman nga pipila sa sakop sa mga tulisan diha sa mga pampubliko nga sakyanan ang nasikop usab sa niaging semana.
Samtang laing 27 pa ka mga tawo ang nasikop sa gihimo nga Sempo sugod niadtong Huwebes sa gabii, hangtud Lunes sa kaadlawon, Mayo 27. (Superbalita Cebu)