PIPILA na lamang ka adlaw og matapos na ang bakasiyon sa mga estudyante, apan pabilin nga nagpahimangno ang tinugyanan sa Regulatory and Complaint Board ngadto sa mga ginikanan paglimita sa ilang mga anak sa paggamit sa internet.
Sa pakighinabi kang abogado Edgardo "Egay" Uy, tsirman sa Regulatory and Complaint Board (RCB), gibutyag niini nga dili gayud maayo ang digital parenting base na usab sa presentasiyon sa Department of Information and Communications Technology (DICT) gumikan kay mawala ang mga pisikal nga kalihokan sa usa ka bata.
"Duna'y findings ang DICT sa ilang usa ka presentation nga dili gyud maayo ang digital parenting kay ang bata mahimo nga passive, ang physical exercise gakawala kay gasige lang og lingkod, ang kamot lang ng ma muscle-lan," matud ni Uy.
Tungod niini, nagpahimangno ang RCB ilabi na sa mga ginikanan sa paghatag og limitasiyon sa oras nga ihatag sa internet bisan pa man sa nahabiling takna sa bakasiyon.
"Ato gyud nga obligasiyon mga ginikanan nga bantayan gyud nato atong mga anak maski bakasiyon nga limitahn ang oras sa internet," dugang niini.
Giingong padayon ang mga inspeksiyon sa mga internet shop ilabi na sa pagbalik na sa klase diin hugot nga ginadili ang paggamit sa mga menor de edad sugod alas 7 sa buntag hangtod na sa alas 3 sa hapon, apan sa mga imnanan nagpadayon ang mga inspeksiyon sa inspectorate team.