USA ka semana nga kalihokan sa tanang mga sakop sa prensa ang pormal na nga gisugdan sugod Lunes, Mayo 27, ngadto adlawng Sabado, June 1, alang sa Press Freedom Week celebration.
Ang kasaulogan karon usa ka talagsaon nga kalihokan gumikan kay ang Cagayan de Oro Press Club, Kapisanan ng mga Broadcaster ng Pilipinas lakip mga mamamahayag ug magsisibya gikan sa mga buhatan sa gobyerno nagkahiusa sa pagsaulog ning selebrasyon lakip sab niini ang Regional Association of Government Communicators, National Union of Journalists of the Philippines Cagayan de Oro chapter, Energy Press Corps, Technical Education and Skills Development Authority (Tesda) Northern Mindanao Press Corps, Philippine National Police Press Corps.
Ang tema karong tuiga nga selebrasyon mao ang, "A United Media in the Face of Threats."
Niadtong adlawng Lunes, usa ka santos nga misa ang gipahigayon nga gipangulohan ni kanhi COPC President Monsignor Elmer Abacahin.
Lakip sa nagsilbing sponsor sa mga dagkong kalihokan mao ang Cagayan de Oro City Government, Provincial Government ubos ni Governor Bambi Emano, Steag State Power Inc., PhilHealth Northern Mindanao ug Tesda Northern Mindanao.
Nagkadaiyang sports activities sab ang gipreparar sama sa basketball, volleyball, chess, bowling, archery ug uban pa.
Aduna sab mga seminars ug training nga giandam alang niadtong mga sakop sa prensa nga makakat-on og dugang kahibalo diha sa luwas nga pamahayag ug pagsibya.