DILI bakante ang posisyon sa City Police Director sa Cagayan de Oro City Police Office (Cocpo), hinungdan nga dili kini mahimong aplayan sa kasamtangan.
Kini human sa nahitabong aksidente ni Police Colonel Nelson Aganon, hepe sa Cocpo, niadtong niaging semana.
Gibutyag ni Police Lieutenant Colonel Surki Sereñas, kinsa tigpamaba sa Police Regional Office (PRO) Northern Mindanao, nga emergency ang nahitabo kang Aganon.
Nagpaabot sa iyang kadismaya si Sereñas sa migawas nga mga report nga gipapaspan nga mahulipan sa iyang posisyon si Aganon, kinsa nagpabilin pa sa intensive care unit sa Polymedic Medical Plaza human naaksidente sa motorcyle training course sa kapulisan.
Dugang ni Sereñas nga anaa pa sa posisyon ang usa ka tawo ug unta dili pangunahan ug magbaton sa delikadisa.
Gipasabot niini nga usa lamang mahulipan ang usa ka opisyal kon kini adunay serbisyo nga duha ka tuig apan sa estado karon ni Aganon sa pagkakaron, pagklaro niini nga ang administrator sa Cocpo nga si Police Lieutenant Colonel Reynante Reyes maoy nagsilbing officer-in-charge.
"Actually, dili maayo nga aplayan kay ang atoang Cocpo dili vacant, naa tay city director unya aplayan nimo, delikadisa pod. Ginabantayan gyod nato ang pagkahuman sa two years or retirement sa usa ka opisyal. Ang nahitabo sa atong city director emergency ang nahitabo ug dili bakante," matud ni Sereñas.
Samtang iyang giklaro nga wala pay direktiba gikan sa bag-ong regional director nga adunay mahitabong dakong lahugay sa mga dagkong opisyal sa nagkadaiyang buhatan sa kapulisan.
Matud ni Sereñas nga hangtod walay direktiba ug sulat gikan mismo ni Regional Director Police Brigadier General Rafael Santiago Jr., dili pa niini mabutyag ang sitwasyon.
Apan lauman nga mahitabo kini labina kay bag-o ang regional director apan hangyo ni Sereñas nga unta dili pangunahan ang namunoan.
"Until wala pa tay makuha nga official order gikan gyod sa atoang regional director dili gyod nato pwede masulti. As long as dili nato magunitan ang order dili ta makahatag og confirmation," matud ni Sereñas.