P2.4M balor sa 'shabu' nasakmit

GIBANA-BANANG 300 gramos sa gitouhang shabu nga mobalor og P2.4 milyon ang nasakmit human nagmalampuson ang hiniusang pwersa sa kapulisan ug mga drug operatives sa pagsikop sa gikonsiderang "big fish" atol sa usa ka buy-bust operation niadtong 9:30 Domingo sa gabii, Mayo 26, sa lungsod sa Lala, Lanao del Norte.

Ang hiniusang operasyon gilangkoban sa Regional Drug Enforcement Unit (RDEU) sa pagpangulo ni Police Major Ian Datiles, Philippine Drug Enforcement Agency sa Northern Mindanao nga gipangulohan ni Regional Director Wilkins Villanueva, ug Lala Municipal Police Station sa pagpangulo ni Police Major Jonan Acop.

Sa operasyon, giingong positibong napalitan sa ginadili nga druga mao si Erwin Madid, giingong driver sa usa ka pulitiko nga nakabasi sa Maranding sa maong lungsod ug usa ka Maumar Panda nga taga Sultan Naga Dimapuro.

Nasuta gikan sa RDEU nga tulo na ka semana nga giingong gihapa-hapaan sa operatiba si Madid ug ilang gitransak niaging semana, apan gibalibaran sila sa ilang order.

Niadtong Domingo, nakatext kini nga andam na ang ilang giorder nga 100 gramos, hinungdan ila kining giadtoan sa Maranding kon asa dinhi gusto himoun ang transaksyon.

Positibo ang pinalitay usa dayon mikasa ang kapolisan.

Gani, aduna pay dala nga kalibre 45 si Madid nga kargado og mga buhing bala, apan wala sab kini makasukol ug nadakpan kini deretso.

Giingong si Panda ang usa sab sa katransaksyon niini hinungdan nga lakip sa gidakop.

Nasakmit sa posisyon ang nagkadaiyang dagkong pakete sa gitouhang shabu nga gibana-banang moabot sa 300 gramo adunay street value nga P2.4 milyon lakip ang kalibre sa pistola ug motorsiklo.

Sa pagkakaron, ang mga nasakmit nga ginadili nga druga giduso na sa crime laboratory alang sa masusing eksaminasyon.

Gitakdang mag-atubang og kasong kasupakan sa Republic Act 9165 kon Dangerous Drugs Act ang mga dinakpan.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph