NALUBAAN sa tagbalay ang usa ka lalaki nga gituohang kawatan human nasapon nga nisulod sa balay niadtong Lunes, Mayo 27, sa J.R. Borja extension, Macajalar, Barangay Camaman-an, siyudad sa Cagayan de Oro.
Samad sa likod ang naangkon sa maong lalaki, kinsa walay identipikasyon kunduli ang patik lamang nga "Pagol," kinsa gituohang taga Tangkongan, Pinikitan, Camaman-an sa maong siyudad.
Si Pagol nasapon nga nagbitbit na sa laptop sulod sa panimalay sa pamilyang Arda.
Sa pakighinabi kang Police Chief Master Sergeant Romulo Lim, imbestigador sa Police Station 3 sa Agora, gibutyag niini nga nakamata ang tagbalay hinungdan nga nasapon ang suspek.
"Iyang gikuha ang laptop apan pakyas siya nga iyang makuha kay nabuhian man niya nga naa pa sa sulod sa kwarto, tungod sa kasikas nakamata ang mga tagbalay," matud ni Lim.
Gidugang pa ni Lim nga naunhan ni James ang suspek sa pagdunggab isip depensa na usab sa kaugalingon.
"Iyang gi-aksiyonan og dunggab ang anak nga si James Arda ug maygani kay nakalikay ug aduna man poy nabitbit si Arda nga panghiwa sa nangka didto pagdepensa sa kaugalingon naunhan niya og dunggab," dugang ni Lim.
Gibutyag usab ni James Arda Sr., anak sa tag-iya sa panimalay nga si Jaime Arda, 68, nga na-korner niya ang usa sa mga suspek ug gisug-an niini ang dagway.
Apan gidasmagan siya ug gi-aksiyonan pagdunggab gamit ang kutsilyo nga dunay gitas-on nga anaa sa 14 ka pulgada nga pang-ihaw ug baboy apan swerteng nakalikay.
Giingong buot lamang niini nga mapugngan ang pagdagan sa suspek apan nakurat na lang sa dihang nakitang nagkadugo na ang dala usab nga kutsilyo nga panghiwa og prutas.
Magpasaka og kaso ang tagbalay nga robbery ug attempted homicide human nga gisulayan pagdunggab si James.
Si Pangol anaa karon sa Northern Mindanao Medical Center.