MATOD pa sa panultion sa basketball, lingin ang bola. Busa, wala’y nakaseguro kon kinsa ang mopatigbabaw sa panagharong sa back-to-back defending champion Golden State Warriors ug Toronto Raptors sa 2019 National Basketball Association (NBA) Finals.
Ania’y panagparang nga gihan-ay ang AP News nga posibleng makatabang alang sa pagtimbang-timbang ning maong panag-engkuwentro sa Western Conference champions ug Eastern Conference champions.
STARTING GUARDS
Golden State: Stephen Curry ug Klay Thompson.
Toronto: Kyle Lowry ug Danny Green.
Analysis: Dili ikalimod ang kalig-on ug liderato ni Lowry apan ning maong panagparang, tatawng nakapabor ang Warriors.
Sila si Curry ug Thompson, nga gitawag og Splash Brothers, nagkumboya og average nga 42.5 puntos sa tanang kombati sa finals nga nag-uban sila.
Si Green kinahanglang mokayod pa og dugang aron makatabang kang Lowry sa ilang posisyon.
Nakabintaha: Warriors.
STARTING FORWARDS
Golden State: Kevin Durant/Andre Iguodala ug Draymond Green.
Toronto: Kawhi Leonard ug Pascal Siakam.
Analysis: Nasayran nang daan nga dili makaduwa si Durant sa Game 1 gumikan kay padayon pa kining nagpaalim sa angol sa iyang tiil. Dili pa sab klaro kon kanus-a gyud siya makabalik.
Kon wala man si Durant, naa si Iguodala nga andam mobuhat sa tanan aron makatabang sa team. Si Iguodala kanhi Finals MVP.
Samtang si Green dugay ra nga nakapamatuod nga dako siya’g ikatabang sa Warriors kutob sa iyang makaya hilabi na sa depensa.
Si Siakam maoy napiling Most Improved Player ning maong season, pasidungog nga puwede niyang ibawon sa iyang pagpatong sa finals sa labing unang higayon.
Sa iyang bahin, si Leonard daghan na’ng gubat nga naagian ug nakatilaw na sab kini’g korona dihang nagduwa pa kini sa San Antonio Spurs.
Isip usa ka lider sa Raptors, gipakita ni Leonard nga andam niyang antuson ang tanan alang sa kaayuhan sa bag-o niyang puwersa.
Nakabintaha: tabla (depende kon kanus-a mobalik si Durant)
STARTING CENTER
Golden State: Jordan Bell (gilauman).
Toronto: Marc Gasol.
Analysis: Taodtaod na sab nga naghuwat si Gasol nga makataak sa finals ug seguradong nagpanikad na kini.
Si Bell, kon mahimo man siyang starting center, hayan dili kini mabintahaan ug nakatigom na sab kini’g 35 puntos sulod sa 11 ka mga duwa ning maong playoffs.
Hinuon dili ikasurpresa nga mobalik na si DeMarcus Cousins sa Game 1 apan kuwestiyunable kon mahimo ba kining starting center.
Nakabintaha: Raptors
BENCH PLAYERS
Golden State: Kevon Looney, Shaun Livingston, Quinn Cook, Andrew Bogut.
Toronto: Fred VanVleet, Norman Powell, Serge Ibaka.
Analysis: Mas lawom ang bench rotation sa Warriors ug posibleng mas molawom pa kini kon makabalik na’g duwa sila si Cousins ug Durant return.
Apan labing segurado, dili magpabintaha ang bench players sa Raptors hilabi na sila si VanVleet, Powell ug Ibaka nga dako gyud og natampo sa naabot sa Raptors ning maong season.
Nakabintaha: Raptors. (ESL)