KON siya lang ang matuman, gusto ni Brgy. Ginebra Gin Kings coach Tim Cone nga ang iyang import nga si Justine Brownlee maoy kuhaon sa Gilas Pilipinas isip naturalized player alang sa kampanya niini sa umaabot nga FIBA Basketball World Cup.
Gibuhian ni Cone kining maong pamahayag human sa kadaugan sa Gin Kings batok sa Meralco Bolts, 110-95, niadtong Dominggo sa Philippine Basketball Association (PBA) Commissioner’s Cup diin nagpakatap si Brownlee og 27 puntos, 12 rebounds ug walo ka assists.
Giangkon man tuod ni Cone nga wala siya’y labot sa proseso sa pagpili sa mga magduduwa alang sa national team apan iyang gipabuhagay nga makatabang og dako si Brownlee sa team.
Gipasabot ni Cone nga taas ang iyang respeto sa kasamtangang naturalized player sa Gilas nga si Andray Blatche apan kon siya lang ang pangutan-on, mas ganahan siya ni Brownlee.
“I know that Andray (Blatche) is a great player and I know all those guys. I really don’t have any say in that. But I tell you, my vote goes to Justin as the (naturalized player) for the national team,” matod ni Cone sa interbyu sa Spin.ph.
Basi sa kasinatian ni Cone, dili angayang ibaliwala ang iyang mga sugyot gumikan kay seguradong aduna kini igong basihan.
Apan dili pa lang dugay, gipaneguro na’ng daan ni national team coach Yeng Guiao nga dili na mahilabtan ang luna ni Blatche alang sa Gilas Pilipinas. (ESL)