HINAYHINAY nang napamatud-an sa Blackwater Elite nga dili taphaw ang kalig-on nga ilang gipakita sa sayong bahin sa Philippine Basketball Association (PBA) Commissioner’s Cup pinaagi sa pagrehistro og laing kadaugan niadtong Dominggo sa gabii sa Araneta Coliseum.
Ang Elite ningpukan sa Columbian Dyip, 118-110, aron iposte ang ikatulo nilang sunodsunod nga kadaugan sa samang gidaghanon nga mga duwa nga nagtuboy kanila sa talagsaong posisyon alang kanila – liderato.
Sama sa nangagi nilang duha ka mga duwa, ang Elite gipangulohan sa ilang import nga si Alex Stephenson ug impresibong rookie nga si Bobby Ray Parks Jr. apan ning higayuna, nakadawat sila’g saktong suporta gikan sa uban nilang mga kauban.
Si Stephenson nagpakatap og 26 puntos ug 21 rebounds alang sa Elite, nidugang og 23 puntos si Parks Jr samtang ningtampo og 19 puntos matag usa sila si Alein Maliksi ug Mac Belo.
Ang Elite gikan sa duha ka sunodsunod nga kadaugan nga parehong miagi og overtime batok sa Meralco Bolts ug defending champion Brgy. Ginebra Gin Kings.
“The challenge, really, was to get this win and I reminded the guys we have to take care of business from the get-go,” matod ni Elite coach Aris Dimaunahan.
“Plus the fact that Columbian, if you slack against them, they’ll step on you. So congratulations to our guys for not letting that happen.”
Ang Columbian Dyip nadasmag sa ikatulo niining sunodsunod nga kapildihan.
Sa laing duwa, ningbangon ang Gin Kings gikan sa ilang kapildihan batok sa Elite ug ilang gipahimungtan ang Meralco Bolts, 110-95.
Ang Gin Kings mingsaka sa 1-1 nga rekord samtang ang Bolts ningkanaog sa 1-2 nga baraha.
Puntos matag usa
1st game
Ginebra 110 - Brownlee 27, Aguilar 19, Dela Cruz 16, Mercado 14, Thompson 11, Slaughter 8, Mariano 8, Tenorio 4, Ferrer 3
Meralco 95 - Lawal 38, Amer 10, Newsome 8, Hodge 7, Salva 6, Pinto 6, Canaleta 6, De Ocampo 5, Hugnatan 4, Jackson 3, Tolomia 2, Quinto 0, Caram 0.
2nd game
Blackwater 118 - Stepheson 26, Parks 23, Belo 19, Maliksi 19, Sumang 11, Digregorio 9, Tratter 5, Al-Hussaini 2, Javier 2, Alolino 2
Columbian 110 - Barone 21, McCarthy 20, Perez 17, Khobuntin 10, Celda 10, Camson 7, Cabrera 6, Escoto 6, Faundo 4, Calvo 4, Cahilig 3, Corpuz 2. (ESL)