CHITO E. GERMINO
Paknaan, Mandaue City, Cebu
ALAS 9:30 sa buntag. Nakapansak na si Atty. Rudy Gabucan, 62 anyos, sa katapusang bakanteng parkingan nga libre sa Green Meadow Mall sa dakbayan sa Mandaue. May napulo ka parkingan dinhi sa kasadpang habig sa Mall nga mao na lay way bayranan. Ang laing mga parkingan libot sa Mall tag P10 ang bayranan matag oras. Mipahiyom siya sa kahimuot samtang hinay nga mipahimutang sa iyang kotse. Apan maghulat pa siyag 30 minutos aron makasulod sa Mall. Alas diyes pa kini mangabli. May kasabot siya nga kliyente nga may ikonsulta kaniya. Adto sila mag-abot sa lingkuranan atbang sa usa ka ‘bookstore.’
Duna siyay andam nga gamit samtang magpalabay sa oras. May dala siyang basahon. Magbasa siyag libro. Libro nga sinulat ni Barry Manilow ang iyang gidala karon. “Sweet Life” ang ulohan, ‘autobiography’ ni Barry Manilow. Nangabli siya sa bentana sa iyang wala ug tuo aron lusot-lusot lang ang hangin. Nalandungan pa man sa bilding ang parkingan.
Gipakli niya ang libro aron sugdan pagbasa.
“Maayong buntag, Sir!” tingog sa babaye habig sa iyang wala. Na-isturbo siya.
“Maayong buntag sab,” matod ni Rudy. Nakita niya ang babaye nga desente og barog. Gibutang niya ang libro sa ‘dashboard.’
“Sir, pwede ko magpakitabang nimo o mangayo og pabor?” sa babaye nga kuwarentahon ang pangedaron.
“Unsa may imong problema?” ni Rudy nga nahibulong. “Nasayod ba kaha ni nga abogado ko? Unsa kahay raket ini?’ ni Rudy sa ihang hunahuna.
“Usa ko ka Muslim, Sir. Nagpuyo ko sa Lapu-Lapu City,” sa babaye.
“Way problema, Misis, ang relihiyon alang nako. Ma-Muslim ka o bisan unsay relihiyon nimo, wa koy ikasaway. Puro ta Pilipino. Kristiyanos ko. Allah imong Ginuo. Higala ra na sa Diyos sa Kristiyanos. Managhigala man gani ang Diyos ug si Satanas. Ang importante gihigugma nato atong isigka tawo sama sa atong kaugalingon. Kita ray magtinabangay.. Unsa may akong ikatabang nimo?” ni Rudy. Nakuryuso gihapon siya kon unsa ang raket sa babaye.
“Mouli unta ko sa Lapu-Lapu, apan wa koy ikaplete,” sa babaye nga maulawon.
“Pilay plete didto?” ni Rudy.
“Diyes pesos. Akong pitaka god nadala sa akong anak sa eskuylahan. Nalimot siya pag-uli ini ngari nako. Nalimot sab kog bawi,” sa babaye.
Mikuot sa iyang pitaka si Rudy. Nangitag P20 nga papel. Puro manggatos ang iyang kuwarta. Gihiling niya ang butanganan og biyugol (coin) tungod sa kambiyuhanan. Gipunit niya ang duha ka singko pesos nga biyugol.
“O, Misis, o,” ni Rudy nga mitunol sa kuwarta sa babaye.
“Salamat kaayo, Sir!” sa babaye nga midawat.
“Way sapayan,” ni Rudy nga nagpahiyom. Gikuha niya pagbalik ang libro. Misugod pagbasa. Apan nasiklapan niya nga wa gihapon molakaw ang babaye. Mitutok kini kaniya nga nagpahiyom.
“Suwerte gyud kaayo ka, Sir! Daghan kag kinabuhi nga naluwas,” matod sa babaye.
“Ha? Unsay buot nimong ipasabot?” ni Rudy nga naisa ang kilay.
“Sakop kos Abu Sayaff. Gisugo ko sa akong labaw nga pahimuon og pagsulay sa mga Kristiyanos. Usa lang ka oras akong misyon, gikan sa alas 9 hangtod alas 10 karong buntaga. Kutob alas diyes kon way mohatag nakog P10, tamnan og mga bomba ang parkingan. Tungod sa imong kaayo, di na mahinayon ang among plano,” sa babaye nga mitalikod dayon.
Gisundan ni Rudy og tan-aw ang babaye nga nagkalayo. Wa dayon siya katuhog sa mga pulong sa babaye. Dihang nakasabot na siya, kalit siyang nangluspad. Mikaging siya sa iyang gilingkuran. Nanguros siya nga nagkurog ug mituaw, “Hesus, Maria y Hosep!”
(KATAPUSAN)