ALANG nako sayup si Jimmy Bondoc sa iyang mga pamahayag nga excited na kuno siyang makit-an ang ABS-CBN nga masirad-an na.
Bug-at sad ang iyang mga akusasyon nga luto kuno ang mga show sa ABS-CBN ug dunay mga “sexual favor” nga nagpahipi aron mahatagan og break ang ilang mga talent.
Una sa tanan, unsa may iyang ebidensiya? Ug nganong karon ra man siya nitingog? Nganong wa man ni niya gibulgar niadtong sige pa siya og gawas sa mga show sa ABS-CBN aron i-promote ang iyang mga kanta?
Kini ra bang pulitika weder-weder lang. Dili unta siya mag-ingon ana kay gikan gud sad siya sa showbiz.
Siyempre daghan ang masakitan kay sama ra nga iyang gikulban og kun ang iyang mga katrabaho.
Kahibawo ta kon unsa ka influential sa mga taga-showbiz bisan sa pulitika. Kadaghan kahang masuko kon pasirad-an nila ang ABS-CBN.
Dili sad ko motuo nga ingon ana ka mabaw si Presidente Rody Duterte nga dili na niya i-renew ang franchise sa Kapamilya inig expire niini sa Mayo 2020 tungod lang kay wa gipagawas ang iyang political ad atol sa 2016 presidential election.
Daghang paagi aron makabawos si Duterte sa ABS-CBN kon nasuko gyud siya. But that’s the worst scenario nga pasirad-an niya ang maong estasyon kay siguradong mosumbalik ra ni nila.
PISTA SA LILOAN
Puwerteng trapika sa poblacion sa Liloan niadtong Dominggo sa hapon kay usa ra ka lane ang gipaagian tungod sa gipahigayong Rosquillos Festival street dancing.
Bisag duha ka lane trapik man gani gihapon, unsa pa kaha kon usa ra. Kay nag-angat karon ang kapistahan sa tinuig nga pangilin sa atong mahal nga patron San Fernando El Rey.
Niadtong Mayo 24 gipahigayon sad ang Queen of Liloan 2019 diin nagtigi ang mga kinabraytan ug kinagwapahang mga sakup sa LGBT nga nadaug ni “Mara Amit” nga maoy atong bida sa “Ssssuper Ka!” karong Huwebes nga maoy adlaw sad sa kapistahan sa Liloan.
Karong gabii, Mayo 28 dunay variety show nga himuon sa Municipal Hall ground diha sa plaza mismo atbang sa simbahan.
Samtang ang pista sa among mahal nga patron nga si San Antonio de Padua sa Jubay, Liloan sa June pa dungan sa Kamagayan ug diha sa may kilid sa Sun.Star ug hasta sa R.R. Landon diin ko nagdako.
Malipayong kapistahan sa tanan!