ANG national ug local government officials niadtong Sabado, Mayo 25, nagpakita sa kamahinungdanon sa paningkamot, disiplina ug pag-eskwela atol sa awarding sa Barangay 76-A Summer Futsal Clinic and Tournament sa S.I.R. Phase 2 covered court sa Davao City.
Si Philippine Sports Commission (PSC) Commissioner Charlest Maxey sa iyang welcome message, "Ipadayon inyong sport pero ayaw kalimti inyong pag-eskwela."
Si PSC chair William Ramirez misegunda niini dungan sa pagsulti nga importante kaayo ang edukasyon alang sa kalampusan.
"Gusto mong mahimong outstanding athlete, musikat pero dili na libre. Inyong sakripisyohan og praktis dili kinahanglan anak sa datu maski pobre, ako anak sad ko og pobre, basta maayong kaon og tulog mueskwela, mamasa, maminaw. Hardwork ang sikreto sa kinabuhi. Walay lugar ang batang tapulan sa success," pung ni Ramirez.
Si Maxey ug Davao City Councilor Mabel Sunga Acosta mihatag og medalya sa champion teams S.I.R. 1 (boys under-10), Doña Pilar (boys under-12) ug S.I.R Cute (girls under-12), S.I.R. Boys (mix under-eight) ug S.I.R. (boys under-14).
Si Acosta midonar og medalya samtang ang PSC mo-abaga sa gastos sa futsal clinic ug torneyo.
Tanang partisipante makadawat og sertipiko.
Si Acosta nagdugang nga ang futsal usa ka maayong isports sa kabataan tungod sa “determination, strong legs and strong heart”.
Ang futsal clinic and tournament gisuportahan sa Davao South Regional Football Association, Football for Humanity and Maharlika Sports Foundation, Inc. sa kooperasyon sa Barangay 76-A officials sa pagpanguna ni Barangay Kapitan Rolando Trajera. (PR)