DEAR Noy Tikyo,
Itago lang ko sa ngalan nga Lilia, 25 anyos. Ang akong problema bahin sa akong igsuong lalaki, nag-edad og 12 anyos.
Nagproblema mi niya kay kaniadto ganahan man siya mo-eskuwela. Di gani halos mo-absent sa klase.
Apan niadtong mga Disyembre 2018 o Enero ning tuiga, namatikdan namo nga di na siya ganahan mosulod sa eskuwela.
Sa dihang among gi-istorya, nisulti siya nga di siya ganahan sa iyang mga classmates hinungdan nga di na siya mosulod sa eskuwelahan.
Maayo na lang kay nadala pa na mo siya og istorya aron tapuson ang klase niadtong Marso.
Karon balik na sab ang among problema kay sa dihang giingnan namo siya nga magpa-enrol na mi, nibalibad na man siya ug di na kuno siya mo-eskuwela.
Hapit na bayang klase, basin unya ug mauwahi siya ug di hinuon maka-eskuwela kay puno na.
Among namatikdan nga nabuang na siya og kuyog sa mga barkada ug kanunay na magyampungad sa internet cafe.
Mao nga problemado kaayo mi karon. Unsa kahay among mahimo niya, Noy?
Lilia
***
Lilia,
Kadto pa untang Enero, gi-adto na ninyo ang eskuwelahan aron pakig-istoryahan ang iyang maestra aron nga sutaon kon nganong naingon ang bata niini.
Mas maayo man god tong ang maestra mismo ang inyong maistorya kay siya ang nasayud sa mga panghitabo sud sa eskuwelahan bahin sa bata. Kadto pa lang, nahatagan na unta ninyo og solusyon ang maong problema.
Hinuon, di pa man uwahi ang tanan. Sulayi og subay ang iyang maestra karon kay ting-enrol na man. Segurado nga naa gyud ang maestra sa eskuwelahan karon. Kay basin og na-bully siya mao nga naingon siya niini.
Ang bully baya maoy usa sa mga hinungdan nganong di na ganahan ang bata nga mosulod sa eskuwela. Hinuon, panaghap man lang ning ako, basin og duna pay mas dako nga hinungdan gawas niini.
Himoa ninyo kini sa dali nga panahon.
For the meantime, giyahi ninyo siya og maayo ug ayaw pasagdi nga maimpluwensiyahan sa iyang mga barkada.
Unya padayona ninyo og dani ang bata nga motungha gyud. Pasabta og maayo sa ka-importante sa pagtungha. Lisud na og forever na siyang mawad-an og interes sa pag-eskuwela.
Am-am lang ang kuwang niya, ilabi na gyud kon mahibawo na mo sa ugat-hinungdan sa iyang suliran.
Noy Tikyo