KATAPUSANG bahin na sa Mayo. Taliabot na ang ting-ulan Ug ang subling pag-abli sa klase. Uso pod ang trangkaso dala sa mabugnaw nga panahon.
Apan bisan kung hinayhinay nga nawala ang kaalingi-ing sa panahon ug sa kainit sa niaging piniliay, nagpabilin ang kainit sa tawo sa paghandom nga maadunahan.
Nahimong sentro sa kontrobersiya ang Davao region sa tulo o upat ka "investment schemes" nga nisulod dinhi nga gikagubtan sa tanan. Gitawag kini sa pipila nga "pyramiding" ug "ponze scheme" diin sa gamay kaayo nga kapital, sublian kini og taas nga ginansiya sud sa gamay lamang nga panahon.
Daghan kaayo ang madani kay yamat ra'g mokita ang imong kuwarta og 30-100 porsyento human sa usa o pipila ka bulan?
Layo kaayo kini kung itandi sa bangko nga uno porsyento ngadto sa upat ka porsyento lang matag tuig.
Usa nga nahimong sikat mao ang Kapa o "Kabus Padatuon" nga gitawag sa akong higala nga si Tinoy Oplas nga Hakpa o "Hakog Padatuon."
Subay sa balita, gikan daw kini sa Surigao ug nanglalin dinhi sa Davao kay gikontra sa lokal nga panggamhanan.
Imbis "investment", gitawag daw kinig "donation" alang sa "charity work" sa simbahan nga nagsabak niini. Busa kay "donation" man, naturalmente nga walay gihandom nga mobalik pa ang kuwarta nga gitampo sa miyembro gawas sa grasya sa Diyos.
Base sa "Corporation Code" puwedeng makadawat ang "non-government organization" sama sa Kapa sa bisan unsa nga donasyon sa legal nga paagi.
Tuod man, daghang testimoniya pinaagi sa social media ug istorya sa dalan nga nadato ug nahimong hayahay ang pamuyo sa miyembro nga nakapasamot sa interes sa uban. Nagdasok na daw ang bag-ong sakyanan sa Digos City ug Gensan sa mga miyembro nga nakatagamtam sa grasya.
Niadtong niaging semana, nagpunsisok ang mabagang duot sa katawhan sa usa ka mall sa Digos City kay mag pay-off kuno.
Naalarma sab ang Davao City sa pagdagsang nila busa gipasirad-an gidayon ang usa ka opisina sa Ma-a sa isyu nga walay business permit.
Tungod niini naghangyo ang Securities and Exchange Commission (SEC) ngadto sa Department of Interior and Local Government nga tabangan sila sa pagpahamtang sa "cease and desist order" sa naasoy nga mga kompaniya.
Daghang naguol nga "investors" kay basin dili na nila unya makuha ang ilang grasya.
May silingan nga pulis ang akong igsuon sa Davao nga nabalaka kay sobra P600,000 ang iyang gi-invest sa Kapa gikan sa iyang "retirement pay".
Naa poy akong mga kaila nga wala mabalaka bisan kung naka-invest kay sumala pa nila sugal ang ilang gibuhat. Kung tinuod, malipay sila kung dili, pusoy. Karong bag-o, may balita nga nakakuha sila'g "temporary restraining order" sa korte batok sa order sa SEC.
Sa akong kabahin, naa man tinuod madato ug makapahimulos sa maong schema ilabi na kadtong nakauna ug kadtong may kuwarta nang daan. Sakto ang programa nga mawala ang kapobrehon apan dili ingon niini nga ibaligya sa kabus ang ilang kabtangan sa walay klaro nga sugal o negusyo.