SUGOD na ang klase sa Hunyo 3, Lunes, sunod semana. Gani ning higayona, padayon na man ang enrolment sa mga kabataan sa pampublikong tunghaan.
Niadtong milabay nga semana, gilusad ang Brigada Eskwela ug malampuson kining natigayon.
Wa tingali suliran ang pagpalimpyo sa mga tunghaan, kay seguradong daghang ginikanan ug uban pang indibiduwal ug sektor sa katilingban ang dali nga magkatapok ug magbayanihan ug segurado kitang limpyo na ang sulod ug gawas sa mga tulunghaan. Kon duna may angay pang hinloan, seguro dyutay na lang ug mahimo nang himuon sa pagsugod sa klase sa hinay-hinay lang.
Kay ang paglusad sa Brigada Eskwela gitumong man aron nga maandam ang mga tulunghaan sa abri sa klase aron nga di na manglimpyo kay sagbot na kini human ang duha ka bulan nga bakasyon.
Apan unsa gyud kaandam ang mga tulunghaan, ilabi na sa pampubliko, sa pagsugod sa klase? Kaandam di lang ang kalimpyo, apan mismo ang kalidad sa edukasyon?
Natubag na ba sa mga opisyal sa Department of Education (DepEd) ang mga suliran nga kanunay nang mosugat sa mga tinun-an panahon sa abli sa klase?
Sama pananglitan sa classrooms alang sa nagkadaghan nga mga estudyante. Bastante na ba? O kaha ang kakuwang sa mga magtutudlo, nahatagan na ba og kasulbaran? Apil na ang mga textbooks sa kabataan?
Kini maoy angay nga pangandaman, ug di lang ang pagpalimpyo. Kay ang paglimpyo sa mga eskuwelahan mahimo ra sa hinay-hinay. Apan ang kakuwang sa classrooms, magtutudlo, textbooks kinahanglan og dakong panahon aron maandam ang tulunghaan alang sa kalidad nga edukasyon