HAGONOY, Davao del Sur -- Wa pa hingpit masulbad ang pagtaya sa ilegal nga sugal nga Last Two human aduna gihapoy mga suspek ang nasikop sa kapulisan.
Uwahing nasikop ang usa ka babayeng tigpa-Last Two human nasakpan didto sa Purok 9, Barangay Balutakay, alas 9:50 sa buntag, Dominggo, Mayo 26.
Ang suspek nailhan nga mao si Liezel Alcasid CaƱalizo, 39, minyo nga street food vendor ug residente sa Purok 9, Barangay Leling sa lungsod.
Subay sa taho sa kapulisan, naaktuhan nila ang suspek nga nangolekta og taya sa sugal ug nakuha sa posisyon niini ang mga himan sa maong sugal.
Namatikdan nga bisan og aduna nay Small Town Lottery (STL) sa tanang kalungsuran apan aduna gihapoy mga ilegal nga nagtaya og Last Two.
Ang STL lang maoy giilang "legal" sa mga awtoridad sanglit ilawom kini sa Philippine Charity Sweepstakes Office (PCSO).
Apan, sumala ni Major Gil Arobo, hepe sa kapulisan, nga dili na susama kaniadto nga naghitak ang mga usher sa Last Two sanglit kon aduna pay nabilin pipila na lamang ug kadtong mga gahi og ulo aron moundang.
Nagbahad sab ang kapulisan nga padayon nilang ukuyon ang mga ilegal nga usher aron madakpan.