Interview sa scholars ipadayon

DILI na paabuton sa Provincial Women’s Commission (PWC) ang pagsulod sa administrasyon ni governor-elect Gwen Garcia aron ipahigayon ang interviews alang sa mga tinun-an nga nangaply alang sa Paglaum Scholarship Program.

Matod ni Bise Gob. Agnes Magpale nga kung malangay ang pag-atiman sa mga application, hayan nga maulahi sab unya sa enrolment ang mga tinun-an.

Gitakda sa PWC ang interview alang sa mga bag-ong aplikante sa ikatulong tuig sa Paglaum Scholarship Program sunod Lunes, Hunyo 3.

Kini bisan pa man ug pipila na lang ka adlaw sa dili pa hingpit nga mopuli ang bag-ong liderato diha sa Kapitolyo.

Matod sa co-chair sa PWC, Bise Gob. Agnes Magpale, dili na nila paabuton ang sunod nga administrasyon aron maatiman ang mga aplikasyon sa scholarship tungod kay regular na kini nga programa sa provincial government human ma-institutionalize pinaagi sa usa ka ordinansa.

Gawas niini, posibleng malangay sa pag-andam sa ilang requirements sa tunghaan ang mga tinun-an nga nagsalig niini kung dili pa mahibaw-an kung mo-qualify o dili sa scholarship.

Dunay kasamtangang 1,375 scholars ubos sa programa ug gigahinan kini ug P20 million karong tuiga.

Matod ni Magpale nga alang sa pagbukas sa schoolyear 2019-2020, maka-accommodate sila og hangtud 500 ka mga bag-ong scholar.

Gipaniguro sa bise gobernador wala saguli og dili gyud sagulan og pamolitika ang eleksiyon sa mga bag-ong scholar. (AZLG)