DUNAY posibilidad nga kining huwaw nga atong nasinati karon tungod sa giingong huyang nga El Niño molanat pa hangtod sa tapos sa tuig. Igo ba lang kita maghulat kanus-a kini mahuman?
Nakapanguta ko niini kay basin mopadung na sab kita nga pag reklamo ug pagpangita kon si kinsay basulon.
Ang ako kay nahuman na ang panahon sa kampanya ug angayan na kitang motutok kon unsay atong mabuhat panahon sa huwaw.
Panahon nga karon nga makapakita ang mga ningdaog sa giingong panaghiusa sa liderato sa Syudad sa Sugbo, sa Metro Cebu ug sa lalawigan.
Bisan pa og karong Hulyo 1 pa sila opisyal nga molingkod, di man tingale mosuki ang outgoing officials kon moawhag ang mga incoming officials nga magtinabangay.
Pananglitan, panahon na karon nga manglimpyo kita sa atong kasapaan ug mga kanal. Panahon na sab sa pagtukod og mga gagmayng mga dam nga gitawag og weirs aron sa pagbalik sa ulan, dili na mobul-og ang tubig padulong sa dagat ug makatuhop kini ngadto sa atong groundwater.
Panahon sab nga kita makaamgo nga gikinahanglan karon ang makiangayong pag-distribute sa tubig ug unsaon nga makatigum kita sa gamay natong supply.
Hinuon, kon dili pa makakasa ang atong mga napiling opisyal, ngano man diay kon mag-una sa pag-inisyatiba ang pribadong sector labi na sa mga civic groups ug ang civil society.
CHEMISTRY
Makahinumdom gyud ko kaniadtong bag-o pa ko sa University of San Carlos Tech Center (USCTC) pipila na ka dekada nga milabay. Usa sa akong gipang-admire niadtong tungora mao ang mga nanguha og chemical engineering ug kining kurso nga chemistry sa Main Campus niadtong tungora.
Sa akong kabadlungon, bisan pa og engineering ang akong kurso, naabot baya ko og USC main campus sa akong chem lab subject.
Nakahisgot ko niini kay moabot og 1,500 ka mga eksperto sa chemistry ang naa sa Syudad sa Sugbo karon alang sa 34th Philippine Chemistry Congress nga gipahigayon sugod karong adlawa hangtod na sa Mayo 30, 2019 sa diha sa Waterfront Hotel.
Ang manambong mao ang mga sakop sa Chemical Society of the Philippines ug ang Philippine Federation of Chemical Societies.
Tema sa maong kalihokan mao ang “Chembisyon 2019: Kimiko para sa Sariling Bayan.”
Samtang di kaayo nato makita ang epekto niining ilang propesyon, gikinahanglan karon sa atong nasud ang mga scientist labi na kining mga chemist kay nabiyaan na baya kita sa atong mga silingang nasud.
Manghinaot ko nga daghang mga makutlo kitang mga pagtulun-an ug mga kongketong mga proyekto alang sa atong nasud bunga niining dakong kalihokan sa mga chemist dinhi sa Sugbo.
(@anol_cebu sa Twitter)