ROTC. Ang akong mga kaedad labina kadtong nagdako ug nag-eskuyla sa probinsya niagi pagka Boy Scout. Unya, sa pagsulod na sa High School gikan sa First Year hangtud sa Fourth Year dunay PMT (Preparatory Military Training) nga sa uwahiay nga katugian nahimo nga CAT (Citizens Army Training), nga nagmando sa training sa tanan estudyante gawas sa dunay mga kakulian sa panglawas.
Sa kolehiyo mao ang ROTC kon Reserve Officer Training Corps, nga lakip sa tanan kurso nga bali og duha ka tuig nga pag-ensayo ug walay gipili gawas kadtong mga estudyante nga di maayo ang panglawas og dunay sertipiko gikan sa doctor. Sa panahon ni Pres. Cory Aquino ang ROTC niadtong 2002 pinaagi sa RA 9163 nahimo nga opsyonal.
Di ni pagdayeg sa akong kaugalingon, apan akong naagian ug nasinati ang training sa Boy Scout sa elementarya, ang PMT sa high school ug hangtud sa kolehiyo nga gikinahanglan ang ROTC sa tanan nga mga kurso.
Gani, kay gusto man ko’g aksyon na opisyal ko sa Boy Scout ug sa PMT. Sa kolehiyo, ang among ROTC sa University of the Visayas ubos kaniadto sa Philippine Constabulary (PC) didto ko nagpasakop sa Special Force Company nga dunay special training. Ang naandan nga pag-ensayo sa ROTC matag Dominggo ra.
Bisan di ko makasulti sa akong mga kaedad nga niagi sa Boy Scout, PMT ug ROTC, apan makasiguro ko nga tungod sa maong training nakaambit o nakaangkon mi og maayong gawi ingon man disiplina ug respeto sa kaugalingon ingon man sa atong isigkatawo ug pagmahal sa atong nasud.
Ubos sa House Bill 8961 ibalik ang ROTC sa mga estudyante sa Grades 11 and 12 sa mga eskuylahan publiko ug pribado. Ang pagbanhaw sa ROTC pinaagi sa HB 8961 tungod ni sa awhag ni Presidente Duterte nga ibalik ang ROTC sa mga eskuylahan aron dunay disiplina ang mga estudyante ug patriyotismo kon pagmahal sa atong nasud.
Apan ang mga militante dakong supak nga ibalik ang ROTC. Gani, nabulbugalan sa mga netizen ang ilang pagsupak sa ROTC tungod kay di man sila supak kon ang mga batan-on irekrut sa NPA.
Dunay mga kahadlok ug pangagpas sa mga estudyante kabahin sa abuso sa mga opisyal sa ROTC atol sa training. Di malalis nga dunay mga insidente kaniadto nga giingon abuso apan dili ang tanan eskuylahan nahilambigit sa maong isyu. Sa among training sa ROTC Special Force wa mi giabusohan sa mga training officer.
Ang kanang dako og boses o siyagit sa mga opisyal sa ROTC mao na siya ang naandan atol sa ensayo labina sa drill. Unsaon man og dungog sa tanan kon dili isinggit ang mando?