GIBINAKLID nga gipusasan ang duha ka mga kamot sa usa sa duha ka mga tawo nga napalgang patay nga gisunog sa Barangay Putat, bukirang dapit sa lungsod sa Tuburan.
Naukay ang mga residente sa dihang napalgan ang lawas sa duha ka mga tawo nga hangtod ning pagsuwat wa pa mailhi.
Matod ni Police Lt. Col. Ismael Gauna, hepe sa Tuburan Police Station nga pasado alas 6 sa Martes sa buntag, Mayo 28, usa ka concerned citizen ang nanawag sa ilang police station nga adunay mga patayng lawas nga nakit-an.
Dali usab sila nga nanawag og Scene of the Crime Operation (SOCO) aron masusi ang mga lawas.
Sa iyang inisyal nga nakuhang impormasyon, gisunog ang ilang lawas ug di pa mahibaw-an kon giunsa sa pagpatay.
Kasagaran, patyon ang usa ka tawo una sunugon aron lisod ang pag-ila niini.
Gidugang ni Gauna nga posibling gilabay sa maong dapit ang mga biktima tungod kay way nakakita o nakadungog sa pagpatay kanila.
Sa paghiling sa mga sakop sa Soco, pulos mga lalake ang mga biktima nga gituohan nga usa ka semana nang patay tungod kay padulong na madugta ug nanimaho na pag-ayo.
Di pa makasulti si Gauna kon kini mga biktima ba sa salvage bisan kon adunay posas ang mga kamot sa usa sa mga biktima.
Awhag lang niya sa mga lumolupyo sa lungsod sa Tuburan ug mga silingang dapit nga adunay kabanay nga na missing nga moduol sa ilang police station aron sa pag ila sa mga lawas.
“Panawagan ko lang na kung may mga nawawala silang kamag anak, pwede silang pumunta sa Tuburan para ma i-check at the same time , siguro kukunan pa ng DNA ng ating Crime Lab para malaman kung sino talaga itong mga taong ito,” matod ni Gauna.
Si Police Staff Sergeant Joelymar Gulbuena, desk officer sa Tuburan Police Station, niingon nga adunay nanawag sa ilang buhatan sa Martes sa hapon ug nipahibawo nga aduna silay na missing nga mga miyembro sa pamilya.
Apan nag duha-duha kini sa pagtumbok nga ang napalgan sa Barangay Putat ilang kabanay tungod kay adunay apan sa pangisip.
Ang St. Peter Chapels nga maoy mikuha sa duha ka mga lawas miawhag sa mga pulis nga ipalubong nalang kini tungod kay di na masingo ang kabaho niini.
Gipakuhaan na og DNA samples ang duha ka mga lawas aron kon adunay moila niini, ipaubos nila sa DNA examination.
Si Police Colonel Manuel Abrugena, hepe sa kapulisan sa probinsya sa Sugbo, nimando sa Tuburan police station nga ipa flash alarm kon adunay na-missing sa kalungsuran.
“Make a flash alarm po about missing person and coordinate closely sa Soco to identify the victims so we can alert the immediate family sakali pong may mga close to identification the cadaver,”matod n Abrugena.
Gipahibawo na usab nila ang Cebu City Police Office labot sa maong hitabo aron masayod usab ang ubang mga police station.