MOABOT sa kapin 800 ka mga drivers ang gipangdakop ug naisyuhan og temporary operators permit (TOP) ug dul-an 50 usab ang nahatagan og citation ticket atol sa 40 ka oras nga operation sa kapulisan sa siyudad sa Sugbo batok sa mga driver nga malapason sa balaod sa trapiko pagpangandam alang sa balik eskwela sunod semana.
Bisan ang pagtsinelas samtang nagmaneho ila nang dakpon. Matod ni Police Lt. Col. Lorenzo Batuan, deputy city director for administration sa CCPO, tumong sa ilang operation nga gisugdan niadtong Sabado mao ang pagpatuman sa disiplina sa karsada pinaagi sa pag implementar sa Republic Act 4136 kun Land Transportation and Traffic Code.
Moabot ngadto sa 859 ka mga drivers ang nakalapas sa balaod sa trapiko nga giisyuhan og TOP, diin ang ilang mga lisensya giimbargo samtang 47 usab ang giisyuhan lang og citation ticket.
Napulo usab ka mga sakyanan ang gipang impound, lima niini motorsiklo ug lima usab ang traysikad human nga wa makapresentar sa ilang mga lisensya ug dokumento.
Kasagaran sa mga kalapasan sa balaod trapiko sa mga drivers mao ang walay sapatos nga nagmaneho sa ilang mga sakyanan, wala mag seat belt, nagpasakay og mga gagmayng bata sa motor, walay lisensya, wala motuman sa traffic sign ug uban pa.
“We have to do this kay ang opening sa classes karon nang June 3 so kinahanglan nga atong i-soften ang mga karsada. So ang objective is to impose discipline sa karsada,” matod ni Batuan.
Giklaro hinuon ni Batuan nga di na kaayo sila moestrikto sa mga bukirang barangay ilabi na nga ang bugtong kasakyan sa mga tinun-an ug mga residente sa bukid mao ang habal-habal.
Awhag lang sa CCPO sa mga driver nga di mag overloading sanglit usa ni sa hinungdan sa mga disgrasya sa kadalanan.
Magpadayon pa hangtod sa Hunyo ang operation sa kapulisan sa siyudad sa Sugbo batok sa mga driver nga malapason sa balaod sa trapiko. (AYB)