ANG nagkadaghang aktibidad sa dagat tungod sa malambuon nga turismo, mao ang usa sa gitan-aw nga rason sa Department of Environment and Natural Resources (DENR)-Central Visayas nga aduna'y insidente sa mga patay nga pawikan tungod kay naigo kini sa palabad sa pumpboat.
Kini human aduna'y usa ka green sea turtle ang napalgan nga patay sa lungsod sa Moalboal niadtong Dominggo, Mayo 26.
Matod ni Viernov Grefalde, hepe sa Enforcement Division sa DENR-Central Visayas nga tungod kay panahon sa summer, daghang aktibidad sa dagat diin mao kini ang usa sa rason nga aduna'y wala gituyo nga naigo sa palabad sa pumpboat nga mga bao.
Gibutyag usab ni Grefalde nga tulo ka mga patay nga pawikan ang natala na nila diin lakip niini ang Moalboal, Alcantara ug Oslob.
Aduna'y insidente sa Pinamungajan nga gibuhian ang pawikan nga nadakpan.
Usa sa gibutyag ni Grefalde mao ang pakigtagbo niining mga local government units (LGUs) nga aduna'y insidente sa napatay nga pawikan aron pagahisgutan nga malikayan na kini sa sunod.
Malaumon usab kini nga mominus na ang insidente sa mosunod nga buwan kay ting-uwan na ug wala na kaayo aktibidad sa dagat.
Kasagaran nga aduna'y insidente anaa sa kasadpang baybay sa Sugbo o sa habagatan diin malambuon ang eco-tourism.
Ubos sa Republic Act 9147 o ang "Wildlife Resources Conservation and Protection Act" aduna'y silot kining pagtuyo pagpatay sa mga wildlife species.