MAGSAYSAY, Davao del Sur -- Miduyog ang local government unit (LGUs) sa nasudnong pag-obserba sa 121st National Flag Day, adlaw’ng Martes, Mayo 28.
Usa ka flag-raising ceremony ang gipahigayon sa mga lokal nga gobyerno sa ilang munisipyo nga gisalmutan sa mga nasyonal ug lokal nga ahensiya, timailhan sa pagsugod sa selebrasyon sa Flag Day.
Gibutyag ni Mayor Arthur Davin nga ang pag-obserba niini usa ka pag-awhag sa katawhan nga ipakita ang patriotismo ug paghigugma sa nasud.
Ang National Flag Day ginasaulog sa nasud pinaagi sa paghimo og nagkadaiyang aktibidad sa matag LGU aron ipatigbabaw ang patriotismo.
Gitataw ni Davin nga ang National Flag Day, usa sab ka paghinumdom sa Philippine flag diin unang gipataas human ang kadaugan sa “Battle of Alapan” niadtong 1898, nga miresulta sa pagkapukan sa mga Espanyol ug nabawi ang Cavite sa pagpanguna ni General Emilio Aguinaldo.
Ang komemorasyon sa Flag Day gipaluyohan og Executive Order 173, nga gilagdaan ni kanhi Presidente Fidel Ramos, aron sugdan ang pag-obserba niini gikan Mayo 28 ngadto Hunyo 12, nga mao ang adlaw sa Independensya sa nasud. (Orlando B. Dinoy)