ANTIPAS, North Cotabato -- Napulo ka tawo ang naangol human nahulog sa pangpang ang multicab nga ilang gisakyan alas 9:15 sa buntag, Lunes, Mayo 27. Gikanayon ni Antipas chief of police Captain Bernard Abarquez nga sakay ang mga biktima sa “Serbisyong Totoo” nga multicab nga gipanag-iyahan sa lokal nga panggamhanan sa probinsiya gikan sa Arakan paingon sa dakbayan sa Kidapawan. Apan pag-abot nila sa Barangay Pontavedra, Antipas kalit nga nawad-an og preno ang multicab sa dulhugon nga bahin sa kalsada. Wala na makontrola sa drayber ang manobela sa multicab hinungdan nga diretso kining nibangga sa highway barrier ug nahulog sa 20 ka tiil nga gilawmon nga pangpang. Mga biktima giila nga sila Virgilio Amandoron; Heber Caahao, 59; Mary Luiz Digal, 35; Glenda Dejesica, 39; Flordeliza Pacultan; Aser Guanzon, 48; Catherine Cañete, 46; Flordeliza Pacultad; Jolly Beth Dayot; ug ang drayber nga si Ronald Dayot, mga molupyo sa Barangay Gambodes, Arakan. Mga angol daling gitabang sa mga molupyo nga nakasaksi sa hitabo ug gihatud ngadto sa Antipas District Hospital. Nakaangkon lang og mga bun-og ug pangos ang mga biktima sa nagkadaiyang bahin sa ilang lawas hinungdan nga daling gitambalan. (Edgar E. Fuerzas)