GIBAHA og pangutana ang Superbalita sa gipagawas niini nga istorya kalabot sa mga money investment schemes nga nag-operate sa Tagum City nga giingong gikagubtan karon sa katawhan.
Daghan og mensahe nga nadawat ang Superbalita Facebook page kinsa nagapangutana kung unsay pangalan sa upat ka mga kompanya nga 'legit' kung lihetimo.
Sumala pa sa mga nagpadala og mensahe nga gusto sila masayod kung kinsa kini nga mga legit aron ilang mabasihan ang ilang plano sa pag-invest.
Sa pagsubay sa Superbalita ngadto sa ahensya nga nag-imbestiga niini, giklaro nila nga dili sila pwede makapagawas og sama nga impormasyon sanglit nagpadayon pa ang ilang imbestigasyon.
Sa karon ginapailalom pa sa makuting pagsusi ang gipasa nga mga papeles sa mga investment company sa maong ahensya aron mahingpit ang ilang legalidad. (Richy F. Nalagon)