NAANGKON nila ni Rosendo Yamyamin ug Rey Flores ang kalampusan sa labing grandiyusong edisyon sa Cebu Executives and Professionals Chess Association (CEPCA) monthly tournament niadtong Dominggo sa Barracks Chess Club sa Robinsons Galleria Cebu.
Si Yamyamin maoy naghari sa kompetisyon pinaagi sa iyang 6.5 puntos nga nahakot.
Naangkon niya ang P7,000 nga ganti ug siya mao ang morepresentar sa buwan sa Abril alang sa Grand Finals karong Disyembre.
Sa iyang bahin, si Flores maoy nahimong 2nd placer bitbit ang 6.0 puntos.
Si Flores, kinsa nakabulsa og P5,000, maoy morepresentar sa buwan sa Mayo.
Mas dagko ang ganti salapi ning higayuna gumikan kay ang buwan sa Mayo mao ang buwan sa pagkatawo sa kugihang presidente sa CEPCA nga si Engr. Jerry Maratas.
Ang mga naka-qualify nang daan mao sila si Vince dela Torre sa Enero, Amado Olea sa Pebrero, ug Rogelio Enriquez Jr. sa Marso. (ESL)