NINDOT nga aduna nay online ticket transaction ang Oceanjet ingon man ang ubang fastcraft ug slow craft nga magbiyahian gikan sa lalawigan sa Cebu ug silingan nga mga probinsiya.
Malikayan na ang taas nga pila sa mga pasahero nga mopalit sa ticket sanglit dili na man kinahanglan nga moadto pa sila sa ticket counter.
Mahimo man nga mopalit og ticket pinaagi sa internet.
Usa kini sa mga gi-rekomendar sa Economic Development Council ubos sa Regional Development Council sa ilang meting kaniadtong miaging Lunes.
Angayan lang nga awhagon ang mga tagdumala sa maong panakayan nga mogamit na sa moderno nga mga pamaagi sa pagpalit og ticket.
•••
Sa unang panahon, ang mga pasahero sa eroplano kinahanglan nga magdala sa kopya sa ticket aron makasulod ug makasakay sa eroplano.
Dili na karon.
Bisan kon picture lang sa ticket ang ipakita o ID ba kaha, mahimo na nga makasakay o maka-check in sa bisan unsang eroplano.
Ngano man?
Tungod kay duna na may online transaction ang maong mga panakayan.
Gawas nga makapalit ka og ticket pinaagi sa internet, mahimo usab nga mo-check in ang pasahero sa internet og dili na kinahanglan pa nga mo-apil sa taas nga pila didto sulod sa airport terminal.
•••
Nindot kining maong lakang sa EDC-RDC sanglit magahatag kini og dakong kasayon sa tanang mga pasahero, labi na gayod sa mga turista.
Apan dinhi sa lalawigan sa Cebu, dunay angay hinumduman.Angayan nga iapil sa pag-awhag ang mga kadagkoan sa port terminal sa siyudad sa Cebu.
Ngano man?
Adunay gisunod nga patakaran ang mga port terminal sa siyudad sa Sugbo nga dili pasudlon ang mga pasahero nga gusto mosakay sayo sa buntag.
Maghulat pa kini nga buksan ang mga pultahan sa tagdumala sa maong port terminal bisan kon daghan na kaayo nga mga pasahero ang nagpila kay gusto na nga mosulod sa port terminal.
Makita kini sa Pier 1, 2 ug 3.
Magtapok ang mga pasahero sa gawas sa terminal kay dili man sila pasudlon hangtod moabot ang oras nga gitakda sa pagbukas niini, bahala og mag-ulan o magdasok ang mga pasahero.
Angayan lang nga awhagon sab sa EDC-RDC ang namunoan sa port terminal nga abrihan og sayo ang terminal aron dili maglisod ang kahimtang sa mga pasahero sa sayong kabuntagon.