NAGPADALA na’g kumonikasyon ang hepe sa Sulu Provincial Police Office nga si Police Colonel Pablo Labra II sa Police Regional Office (PRO) 7 nga naghangyo nga hatagan og 21-gun salute atol unya sa pag lubong ni Police Captain Delfin Bontuyan kinsa gi-ambush patay niadtong Mayo 21 a may North Reclamation Area, dakbayan sa Sugbo.
Matod ni Colonel Labra, sa dihang nahinabi sa Superbalita-Cebu, nga iya nang napadala ang iyang suwat ug giingong nadawat na kini sa mga opisyal sa Police Regional Office 7.
Nagpaabot nalang siya sa tubag kon aduna bay mga pulis nga tugotan ni Police Brigadier General Debold Sinas nga mohimo sa 21-gun salute nga maoy usa ka tradisyon sa mga aktibong sakop sa militar ug mga pulis nga nahunusan sa iyang kinabuhi samtang nag-duty.
“Nagpadala na kog communication sa PRO-7. I hope i-grant among hangyo nga hatagan si Bontuyan og kataposang respect isip usa siya ka pulis pud ba,” padayag ni Labra.
Si Sinas una nang mipahibawo nga dili lang una sila mosugyot sa pamilya ug lakip na ang Bangsamoro Autonomous Region in Muslim Mindanao Police Office nga hatagan og 21-gun salute si Bontuyan kay basin og balibaran sila niini.
Ugma, Huwebes, Mayo 30, gitakdang ihatod na sa lubnganan si Bontuyan kinsa ubos sa kamandoan ni Labra.
Subay niini, kagahapon sa buntag ang Mabolo Police Station mipadala na unta sa dash camera sa usa ka taxi nga nakakuha sa pagbanhig kang Bontuyan, lakip na ang cellular phone niini ngadto sa Anti Cyber-Crime Group 7.
Apan usa sa mga opisyal sa ACG-7 nga dili lang magpaila mitug-an sa Superbalita Cebu nga dili pa nila masusi ang maong mga ebidensya sanglit wa ang ilang forensic examiner kay mitambong sa hearing sa lalawigan sa Bohol.
Masaligon ang Mabolo Police Station nga adunay makuha nga impormasyon sa video lakip na sa cellular phone sa biktima nga makagiya sa kasulbaran sa pagpatay ni Bontuyan. (AYB)