INAY light rail transit (LRT) system, monorail ang ibutang sa Metro Cebu base sa revised proposal sa Davao-based Udenna Group.
Ang Udenna Infrastructure Corporation ug iyang langyaw nga partner gihatagan og original proponent status (OPS) alang sa iyang proposed Cebu Railway Project ubos sa unsolicited proposal nga giduso ngadto sa Department of Transportation (DOTr) sa miaging tuig.
Gamit ang monorail technology, moubos ang gasto sa proyekto ngadto sa P80 billion, katunga sa gibana-banang magasto sa LRT system, matod ni Manuel Jamonir, assistant vice president for operations and business development manager sa Udenna Infrastructure.
Ang monorail maoy matang sa rapid transit system nga mosubay sa single rail ug sagad elevated kun naa sa ibabaw.
Si Jamonir niingon nga ang DOTr nidawat sa ilang unsolicited proposal ug nihatag kanila og OPS niadtong Disyembre 2018.
Nidumili siya sa pag-ila sa langyaw nga partner, kay wa sila tugoting mobutyag niini.
Ang OPS naghatag sa kompaniya og katungod nga motumbas sa bisan unsang kakompentensya nga tanyag sa usa ka Swiss challenge, usa ka proseso sa procurement nga nagdapit sa laing mga kompaniya nga moapil sa subasta sa proyektong gimbut-an ubos sa BOT law.
Ang paghatag og OPS ngadto sa Udenna temporaryong nagsirado sa pultahan sa ubang mga proponent sa monorail system sa Cebu.
Matod ni Jamonir nga ang project proposal sa Udenna gi-review sa DOTr.
Siya naglaum nga ang DOTr mahuman na sa iyang pag-review sunod buwan ug iendurso ang proyekto ngadto sa Investment Coordination Committee (ICC) sa National Economic and Development Authority (Neda) alang sa technical review sa di pa ipaabot ngadto sa Neda Board alang sa approval.
“We will go through the usual process of project approval. Right now, the project is being reviewed by the DOTr,” matod niya sa telephone interview.
Si Neda Director General ug Socioeconomic Planning Secretary Ernesto Pernia nikompirmar sa email nga ang proyekto wa pa maduso ngadto sa ICC.
Kon ang proyekto ma-award kanila, si Jamonir niingon nga naglaum sila nga ang pagtukod sa infrastructure component sugdan sa 2020 ug mahuman ang kinatibuk-ang proyekto sa mosunod nga tulo ngadto sa upat ka mga tuig.
Ubos sa revised proposal, matod ni Jamonir nga dunay duha ka mga linya, Central Line ug Airport Line.
Ang Central Line, mas mubo kay 17 kilometros na lang kini, gikan sa Talisay City ngadto sa Cebu City samtang ang Airport Line motadlas og siyam ka kilometro, gikan sa Cebu City ngadto sa Mactan Cebu International Airport sa Mactan Island. (SunStar Philippines)