ANG SM Prime Holdings Incorporated (SMPHI) nibayad og P178.1 milyones gikan sa ilang buhisanan sa real property tax alang sa miaging tulo ka tuig niadtong Mayo 14, usa ka adlaw human sa midterm elections.
Kini ang gipahibawo ni Atty. Raul Bito-on, officer-in-charge sa City Assessor’s Office human ilang gi-assess pag-usab ang SM Seaside City niadtong Marso, niining tuiga.
Si Bito-on niingon nga dihang ilang gipada ang final assessment sa ilang propiedad, way pagsupak ang management gawas lang sa P5. 4 milyones assessment sa water supply system nga giingong nadoble.
Si Bito-on niingon nga ang maong letter protest masulbad ra tali sa Cebu City ug SMPHI.
Niadtong 2016, ang SMPHI nibayad lang og RPT sa ilang edepisyo balor og P14 milyones ug way gideklarar nga machinery sama sa airconditioner, elevators, escalators ug uban pa.
Gikan sa P14 milyones niadto, karon nahimo nang P37.6 milyones ang RPT sa edipisyo samtang P21.8 milyones usab ang RPT sa machinery.
Kini nagpasabot nga P59.4 milyones matag tuig ang bayran sa SMPHI.
Ang assessment sa Assessor’s Office way labot sa tower sa SM Seaside City nga karon wala pa makolektahi og RPT sanglit wala pay tax declaration.
Ang gibuhat sa City Assesor’s nahisubay sa mando ni outgoing-Mayor Tomas Osmeña, kinsa nihulagway nga gi-under value ang SM Seaside City niadtong 2016.
Si incoming Mayor Edgardo Labella nihangop sa gibuhat sa Assesor.
Si Labella nibutyag mga mohimo og komitiba nga mosubay sa mga RPT sa dakbayan sanglit siya mismo nagtuo nga aduna pay mga business establishment nga posibleng wa mohaom ang ilang tax declaration sa RPT nga ilang gibayad sa Siyudad. (PAC)