BUOT sa komitiba sa Police, Fire and Public Safety sa konseho nga magpadala na og listahan ang kapulisan sa Police Regional Office (PRO)-Northern Mindanao sa mga kwalipikadong makahulip isip bag-ong city director sa Cagayan de Oro Police Office (Cocpo).
Kini human naaksidente si PCol Nelson Aganon, City Director niadtong Mayo 22 atol sa pre-jump sa motorcycle riding course ug anaa sa talandugon nga kahimtang kinsa pabilin nga giobserbahan sa Intensive Care Unit (ICU) sa Polymedic Plaza.
Atol sa unang sesyon sa konseho human sa eleksyon gidala ni Kagawad Romeo Calizo, tsirman sa nahisgutang komitiba sa konseho sa iyang special report diin naghangyo sa PRO-Northern Mindanao nga maghatag na og listahan sa mga posibleng makahulip sa posisyon ni Aganon.
“I’d like to strongly move for a request the official letter to the Philippine National Police Regional police office for providing us, as soon as possible ASAP a short list of a qualified PNP officers who could take over the position of Col. Aganon,” matud ni Calizo.
Gidugang pa ni Calizo nga wala kini mapilian tungod kay alang kanila nga kwalipikado ang tanan apan sa proseso sa PNP kinahanglan nga pilion ang nagagikan sa listahan sa kapulisan.
“Wala may na sightan or napusoan kay tanan man sila qualified but of course following procedures of the PNP we have to select from among the short list who could take the place of Col. Aganon,” dugang niini.
Giingong kung kinsa man ang mga anaa sa ihatag nga listahan mas pilion ang pinaka senior sa pagpanerbisyo ug kung kinsa ang makahatag gyud og tubag sa panginahanglanon sa siyudad.
Una na niini nga gibutyag nga nagpasalamat kini sa serbisyo ni Aganon diin nakapaubos sa kriminalidad sa rehiyon ug sa siyudad lakip na sa pakigbatok sa ilegal nga druga apan dili usab maayo nga dili kini mahulipan tungod na usab kay dili paigo ang gahom sa usa ka officer-in-charge tungod kay duna kini limitasiyon.
Gipasabot usab niini nga kung makarekober na usab si Aganon kinahanglan pa niini nga magpahulay ilabi na nga ulo ang apektado sa aksidente.
Una na gibutyag ni PL/Col. Surki Sereñas kinsa tigpamaba sa PRO-Northern Mindanao nga respetuhon usa ka dili pa bakante ang poste sa city director sa siyudad.