Aplikante sa civil service exam nga nabulad aksyunan

NIABOT sa atensyon sa usa ka konsehal sa dakbayan sa Cagayan de Oro ang hulagway nga labihan ka taas sa pila sa mga nag-file og civil service exam niadtong deadline niini adlaw’ng Biyernes sa Barangay Carmen, dakbayan sa Cagayan de Oro.

Buot ni kagawad George Goking nga dili na mausab pa ang nahitabo nga taas kaayo nga linya alang sa aplikante nga buot mokuha og eksaminasiyon karong Agusto 4 ug bout niyang maimbitahan ang buhatan sa Civil Service aron mahisgutan ang maong nahitabo.

Gibutyag ni Goking nga susamang gipangbulad ang mga aplikante ug delekado pa kay anaa sa daplin sa dalan naglinya ug abog kaayo.

“Grabe ka bulad, abot pa its uncivilized, akong hangyo sa civil service ayaw na buhata utro,” matud ni Goking.

Gi-aghat usab niini nga kung mahimo sa mall kini himuon ug kung nanginahanglan sila og tabang sa konseho andam usab ang lokal nga kagamhanan sa siyudad sa pakigkoordinar sa mga dagkong patigayon.

“I suggest that next time sa Civil Service or other agencies ayaw i- sacrifice ang safety sa katawhan, do it in safe place do it in the mall, we can ask if they want magpatabang sila sa konseho,” dugang niini.

Nasayran nga niadtong Mayo 23 ug 24, grabe ka taas sa linya nga niabot sa unahan pa sa petron tungod na usab kay giingong mao kini ang ulahing gitugotan nga modawat og aplikante apan bag-ohay lang gilugwayan kini hangtod karong Hunyo 5.

Samtang buot ni Goking nga ipatawag ang maong buhatan aron nga mahisgutan ang maong nahitabo.