Gipuy-an sa mayor sa Claveria gironda

GIRONDA sa mga tinugyanan sa Criminal Investigation and Detection Group (CIDG)-Northern Mindnaao ug uban unit sa kapolisan ang puloy-anan sa inahan sa mayor mga alas 6 sa buntag, Martes, Mayo 29, sa lungsod sa Claveria, Misamis Oriental.

Ang CIDG naghupot og search warrant nga giisyu ni Hon. Mirabeus Undalok, executive judge RTC Gingoog City, batok sa inahan ni Claveria Mayor Miraluna Salvaleon Abrogar nga mao si Gertrudes ug igsuon niining si Reggan Salvaleon human nadawat ang report nga naghupot og mga armas ug adunay private army ang pamilya.

Atol sa search operation, nakuha ang mga armas sama sa M16 Rifle; M14 rifle; KG9 Sub machine gun, kalibre 45 ug ubay-ubay nga bala sulod sa puloy-anan.

Lakip sa gidala sa CIDG ang unom ka mga gituohang sakop sa pamilya nga sila si Joselito Cabaluna, Richie Taquin, Ramie Bacala, Ricardo Sumilla, Ernesto Ayumon, ug Roger Cailing pulos residente sa dapit kinsa sa uwahi nakumpirmang pulos Cafgu o Citizen Armed Force Geopgraphical Unit.

Apan pagklaro sa mayor sa lungsod sa Claveria nga si Miraluna nga ang pagkakuha sa mga armas sa ilang gipuy-an ang wala niya gikabalaka.

Gihimakak niini nga dili gipanag-iyahan sa pamilya ang mga armas ug wala kini makuha mismo sa kamot sa iyang inahan ug sa ilang puloy-anan tungod kay giingong gipanag-iyahan kini sa mga Cafgu.

Nakadawat og hulga

Gipasabot sa mayor nga nagsugod ang ilang problema sa Claveria dihang usa ka Dodot Cawasan, nanag-iya sab og luna sa lungsod ang miprenda sa yuta niini didto sa iyang inahan.

Apan nakurat ang pamilya’ng Cawasan nganong naprenda kini ngadto kanila nga wala man sila mitugot apan diay nasuta nga nagbuot-buot si Dodot sa pagprenda.

Dihang buot na kini ipalukat sa pamilya’ng Salvaleon, nauyonan kini atol sa husay sa barangay apan adunay nadiskubre ang pamilya’ng Cawasan nga wala diay ilang pangalan sa Municipal Assessor.

Butang nga gituohan sa mayor nga gikasuko og maayo ni Cawasan ug sugod niadto daw nagsige na og panghasi kanila ug gisuwayan pa og sunog ang ilang mga ekipo sa umahan.

Si Dodot nga gihulagway niining armado ang nagsige sab panghasi ug pamutol sa mga tanom nga gikahadlokan na kini sa mga residente sa dapit.

Niaging adlaw, si Cawasan mitahan sa kapolisan ug gitouhang maoy nagreport sa mga armas nga gitouhan niining gihuptan sa ilang pamilya hinungdan nga nagpahigayon og operasyon ang CIDG.

Matud sa mayor nga naibtan siya og tunok sa pagtahan ni Cawasan tungod kay nahimo kining babag atol pa sa iyang kampanya ug aduna siyay gakadawat nga bahad nga strapingon ug pusilon gani nagpablotter sab siya mismo sa kapolisan.

“Dili mabalaka ang lungsod Claveria, angayan nga magsadya kay nasulbad na ang dakong problema sa lungsod sa Claveria. Dako among kalipay nga misurender si Dodot Cawasan,” matud ni Miraluna.

“Kining pagdala sa akong mga ginikanan diri sa CIDG dili namo ikabalaka ug ikahadlok kay para kanamo dili man mi guilty limpyo ang among konsensya ug huna-huna. Ang importante para kanamo nga nasulbad na ang problema nga gihatag ni Cawasan nga nakaapekto kanamo pila ka bulan sa katawhan ug kanamo mismo,” dugang niini.

Sa pagsulat ning balita padayon pa ang imbestigasyon sa CIDG samtang si Mayor Miraluna nipaabot sa katawhan sa Claveria nga taliwala paman niini magpadayon ang kalamboan sa lungsod.

Bukas ang mantalaan sa parte sa pamilyang Cawasan.