ADUNA nay miila sa duha ka mga lawas nga gipangsunog ug gipanglabay sa Barangay Putat, lungsod sa Tuburan.
Ang duha gituohan sa ilang mga kabanay nga maoy nanga-missing sukad sa miaging semana.
Nipatim-aw sa PNP Crime laboratory si Carmelita Tierny, inahan ni Nikko Baricar, 34, giingong usa sa napalgan sa Barangay Putat.
Nagpakuha siyag swab sample aron ipaubos sa DNA examination aron pagtino nga usa sa iyang mga anak ang biktima.
Giingong adunay nakuha nga singsing nga matod pa nakapangalan sa iyang kanhi live in partner nga si Chary.
Matod niya nga niadtong Miyerkules pa wa na mopauli sa balay sa iyang live in partner sa Kalunasan.
Giingong nagkauban sila ni John Paul Gallon, taga Barangay Kalunasan ug sa usa ka Isidro Nudalo Jr., alyas “Botex”, giingong igsuon ni Tongol Nudalo, giila nga drug lord sa Sugbo.
Si Botex giingong bag-o lang nakagawas sa prisohan tungod sa kaso sa illegal nga drugas.
Matod ni Tierny nga nanawag ang hinigugma sa iyang anak sa cellular phone ni Nikko pagka Biernes sa alas 3 sa hapon.
Apan lahi na ang nitubag nga giingong si John Paul ug nitug-an matod pa nga naa ra sila sa balay sa ilang brod sa fraternity.
Natulog matod pa si Nikko tungod sa kahubog.
Apan gituohan sa inahan nga wa magtug-an sa tinuod sanglit di moinom og ilimnong makahubog ang iyang anak.
“Nawala na siya Wednesday night. So, nangutana sila asa gyud si Nikko, niingon tong gitawgan nga naa ra daw didto natulog kay hubog daw kaayo,” matod ni Tierny sa mga tigbalita.
Mingaw
Gihulagway sa uyab ni Nikko nga mingaw ang dapit nga giingong giadtoan nga mga tingog lang sa plastic ang ilang madunggan.
Ilang gisuwayan sa pag-contact si Botex pinaagi sa social media ug sa dihang natawgan na, nihimakak kini nga nagkuyog sila.
Martes sa udto human mi boto sa social media ang balita nga adunay duha ka wa mailhing mga tawo nga napalgan nga patay na sa bukirang barangay sa lungsod sa Tuburan nga gisunog, ila dayon kining gisusi.
Gipatan-aw sila sa hulagway sa mga biktima ug sa mga nakuha nga butang.
Ang anak babaye ni Carmelita ang niila sa singsing nga nakuha sa usa sa mga lawas nga iya sa kanhi live in partner sa iyang maguwang.
Apan dili pa gihapon siya kombinsido tungod kay ang iyang anak taas nga pagka tawo nga itomon samtang ang mga namatay sa Tuburan di tantong taas.
Giangkon ni Carmelita nga nabilanggo sulod sa 13 ka tuig ang iyang anak tungod sa mga kasong murder ug frustrated murder niadtong 2004 human malambigit sa away sa duha ka fraternity.
Sakop si Nikko sa Tau Gamma Phi nga niadtong mga tuiga hugot pa nga magkaaway ang Alpha Kappa Rho dinhi sa Sugbo.
Giingong siya ang napasanginlan nga maoy namusil sa ilang kaatbang nga fraternity.
Hitman?
Usa sa mga police official sa Cebu Provincial Police Office nga di lang mag pa hingan mitug-an nga sa dihang sa siyudad sa Sugbo pa siya nadestino dugay na nilang gipangita si Nikko tungod kay siya hitman kaniadto.
Daghan na kinig napatay nga mga batan-on nga kontra.
“Hitman nang bataa sa una. Ako gani nakadakop ana sa ilaha kay naa pako sa Mambaling ato na assign. Bata pa na pagdakop nako mga 20 pa kapin ang edad ana kay perting kursonadaha ana mamusil,” matod sa police official nga nihangyong di nganlan.
Sa nakuha nga impormasyon sa kapulisan sa probinsya sa Sugbo, nasigpatan sila si NIkko ug John Paul sa Siyudad sa Carcar niadtong Biernes sa hapon.
Namalit matod pa kinig illegal nga drugas uban si Botex, apan wa na sila masayod unsay nahitabo.
Ang motorsiklo nga ilang gisakyan napalgan sa Miyerkules sa buntag, Mayo 29, sa usa sa mga barangay sa siyudad sa Carcar. Iya kini ni Gallon.
Nailhan usab si John Paul nga taga Kalunasan sa siyudad sa Sugbo tungod sa iyang gisul-ob nga uniform sa basketball lakip na ang iyang brief.