PULOS nakabsan sa kinabuhi ang driver ug tulo ka mga backrider dihang nabangga ang gisakyan nga motorsiklo ngadto sa ten wheeler truck niadtong alas 11:24 Lunes sa gabii, May 27, sa National Highway sa Barangay Matangad, lungsod sa Gitagum, Misamis Oriental.
Basi sa report sa Gitagum Police Station, nasuta nga una silang nakadawat og tawag gikan sa katawhan kon hain ngilngig nga bangga ang nahitabo sa dapit.
Usa ka Mitsubishi fuso ten-wheeler truck nga gimaneho ni Edesio Cabusas, 56, taga Salvador Lanao del Norte, batok sa motorsiklo nga Honda 150 nga usa ka kolor itom ang gimaneho sa usa ka Jecris Jamis, 22, adunay kaipon, taga Barangay Matangad, susamang lungsod.
Nasuta nga kining ten-wheeler truck ug motorsiklo paingon sa dakbayan sa Iligan niagi sa four lanes. Ni-signal kini nga magpadaplin aron sutaon sa driver ang wala mi-function nga suga samtang naka-on ang hazard light niini.
Apan sa kalit nga hitabo mibangga ang motorsiklo nga sa kilid nga bahin sa truck hinungdan sa ngilngig nga aksidente.
Sa kakusog nga impact, nabunal ug nanglagpot sa kalsada ang driver sa motorsiklo lakip ang tulo ka mga backrider nga sila si Filsant Tagarda, 14; Clint Ivan Jave Tagarda ug John Carl Maagad.
Paspas nga gidala sa Owwa Alubijid Hospital ang driver nga si Jamis apan nakabsan kini sa iyahang kinabuhi ug gideklarar sa doctor nga dead on arrival, lakip si Filsant Tagarda ang patay dihang nahidangat sa ospital sa Polymedic Plaza, siyudad sa Cagayan de Oro samtang niadtong alas 4 Martes sa kadlawon, Mayo 28, nakabsan sab sa iyang kinabuhi si John Carl Maagad sa susamang ospital.
Si Police Staff Sargent Aterno Asequia, kinsa traffic investigator sa Gitagum Police Station, nikumpirma nga ang uwahing biktima nga giobserbahan sa mga doktor nga si Clint Ivan Jave ang nakabsan gihapon sa kinabuhi.
Gituohan ni Asequia nga naglingaw-lingaw lang ang mga batan-on human nakita didto sa area ang ilang mga dala nga guitar ug beatbox.
Dugang niini nga wala nagkasabot ang pamilya sa mga biktima sa settlement ug sa pagsulat ning balita gipreparar na ang kasong reckless imprudence resulting to multiple homicide and damage to properties.
Panawagan na lamang ni Asequia sa mga motorista nga magbinantayon sa pagmaneho labina sa maong dapit tungod kay ngitngit, four lanes kini ug basi sa ilang record upat na ka aksidente natigayon sa maong dapit.