APROBADO na sa buhatan sa National Economic Development Authority (Neda) ang Opol-Naawan Expressway nga phase 2 sa Distrito 2 sa Misamis Oriental.
Kini ang gikumpirmar ni Dr. Jojo Bascug kinsa Provincial Planning Development Officer sa Misamis Oriental.
Dugang niini nga una na nga naaprobahan ang Villanueva ngadto Opol expressway.
Matud ni Bascug nga gipaabot kaniya sa Neda ang maayong balita niadto lang adlaw’ng Lunes, Mayo 27, nga naaprobahan ang phase 2 nga expressway sa lalawigan.
“Gipahibalo ta sa Neda nga approved na ang inyong major infrastructure project,” matud ni Bascug.
Usa kini sa pinakadako nga infrastructure project nga gipropose sa buhatan sa Department of Public Works and Highway Northern Mindanao alang sa lalawigan sa Misamis Oriental kon hain usa kini ka industrial corridor ug proyekto nga parte sa programa ni Presidente Rodrigo Duterte nga Build, Build, Build Program.
Sa pagkaaprobar niini eendorso na dayon kini sa full council ug ang development himoan na dayon og feasibility study aron mapangitaan og pundo.
Matud ni Bascug nga ang Misamis Oriental nga recipient niini nga usa sa pinakadako nga proyekto sa gobyerno ang motabang sa pag-institute niini, samtang tabang sab sa mga implementasyon sa road right of way.
Tungod sa kadako niini nga proyekto sila ang morekognisar sa mga apektadong mga panimalay nga maagian sa expressway.
Dugang ni Bascug nga labihan ang kalipay ni Misamis Oriental Governor Bambi Emano niini nga proyekto gumikan kay dako kini kaayo nga kalamboan sa lalawigan mga napulo ka tuig gikan karon nga mapatuman kini nga proyekto.
“Of course, kung naa na expressway dako kaayo na og benifits sa atoa sa lalawigan especially nga we are industrial province ug mogawas sulod atong mga tourist kay less ang traffic. Kini siya part na kanaa sa build, build, build sumpay na ana from steag sa Villanueva to Naawan,” matud ni Bascug.