SA IYANG pagpakigbatok kang American Keith Thurman karong Hulyo 20 sa MGM Grand sa Las Vegas, USA, sagubangon ni Filipino boxing icon Manny Pacquiao ang gikonsiderar nga labing lisod niyang tahas gikan niadtong napilde siya ni Floyd Mayweather Jr.
Kini maoy hinungdan nga nakatutok og insakto ang Pambansang Kamao ng Pilipinas sa iyang training camp nga bag-uhay lang gisugdan.
Sa usa ka press conference sa New York City dili pa lang dugay, mibahad si Thurman nga iyang paretiruhon ang fighting senator pinaagi sa brutal nga knockout.
Dili angayang ibaliwala ni Pacquiao kining maong bahad gumikan kay usa ka lehitimong knockout artist si Thurman nga naggunit og 29-0, 22KOs nga rekord.
Giklaro ni Pacquiao nga wala siya nabalaka sa hagit ni Thurman, mas nahagit hinuon siya niini.
Matod sa bugtong 8-division world champion nga gusto niyang ipakaon ni Thurman ang mga gipanulti niini inig tagbo nila ibabaw sa ring.
Sa miaging adlaw, yano ra nga gihuman ni Pacquiao ang pito ka rounds nga training ubos sa paggiya ni Nonoy Neri ug daw dili kini gikan sa pipila ka mga buwan nga pagpahuway.
“Napaka-athletic talaga ng katawan ni Manny. Nandu’n ‘yung lakas tsaka ‘yung speed niya. Marami pang oras. Marami pang araw sa training,” matod ni Neri sa interbyu sa GMA News.
Ang American conditioning coach ni Pacquiao nga si Justine Fortune miangkon nga dili angayang kompiyansaan ang abilidad ni Thurman.
“Keith Thurman is better than (Adrien) Broner. He’s better than (Lucas) Matthysse. He’s the best guy we’ve fought in a couple of years. Dangerous guy,” matod ni Fortune. “If we properly stick to our game plan and execute it properly, we’ll get what we want which is a win. Possibly a knockout.” (ESL)