DUNAY kasikas nga mitumaw sa Philippine Olympic Committe (POC) ning unom na lang ka buwan sa dili pa ipahigayon ang Southeast Asian Games (Seagames) sa nasod sugod sa Nobiyembre ning tuiga.
Tungod sa iyang kasagmuyo dalang kasuko, gipangtaktak ni POC President Vic Vargas ang iyang mga tinudlo nga iya ra usab nga gidudahan nga morag nagbudhi kaniya nga imbis mosuporta daw og sa moduot hinuon kaniya.
Taodtaod na tang nakatimaho niining sekretong wa pagkasinabtanay sa mga POC officials sa dihang nakadalikyat ta og adto sa buhatan sa Philippine Sports Commission (PSC) didto sa Kaulohan sa niaging tuig.
Mismo si PSC chairman Butch Ramirez maoy nakapasumbingay nato niini pero niadtong higayona mora pa hinuon to og samad nga nag-umido ang maong huhungihong.
Apan ning semanahona, daw og sa nibuto na ang kaligotgot ug wa na ba kaha makaagwanta si Vargas, iya nang gigamit ang iyang executive power.
Apil ug maoy unang gitarget ang kanhi POC president nga si Peping Cojuangco kinsa 13 ka tuig nga maoy nagdominar sa maong organization.
Si Cojuangco mao unta ang chairman sa Constitutional Amendments Committee apan karon si Vargas na ang modala niini.
Gilakip ang mga gaway ni Cojuangco nga gipangulohan ni Monsour del Rosario, ang sec-gen sa Philippine Taekwondo Association nga mao unta ang chef de mission sa Team Philippines sa 2019 SEA Games apan karon pulihan na ni PSC chairman Ramirez.
Ang ubang gipataktak mao sial si Joey Romasanta, nga pulihan ni POC chairman Abraham “Bambol” Tolentino isip chef de mission sa Tokyo 2020 Olympics, ug Robert Bachman, nga hulipan usab ni Lucas Managuelod sa Muay isip POC membership committee chairman.
Daw og sa nainsultohan man gud si Vargas sa suwat sa POC board nga nagkuwestiyon ug mimando kaniya sa pag-esplikar sulod sa lima ka adlaw kalabot sa incorporation sa Philippine SEA Games Organizing Committee.
Kini human sa gipahigayong special board meeting niadtong Abril 30. Mitambong usab sa kontrobersiyal nga meeting nga sila si Clint Aranas sa archery, IOC representative Mikee Cojuangco-Jaworski, ug lima ka board members. Diha usab si 2nd vice-president Jeff Tamayo, ang treasure nga si Julian Camacho ug auditor Jonne Go.
Maayo kining gihimo ni Vargas ug hinaot nga iyang hutdon pagtangtang kanang mga kaalyado ni Cojuangco nga anaa gihapon sa POC kay kon dili, aw di usab siya makapaabot nga matunhay ang iyang pag-manage niini.
Hangtod karon dako ang akong pagtuo nga gusto gihapon ni si Cojuangco nga mokontrolar sa POC human kini siya mapildi sa miagi nilang election.
Di mahadloki si Vargas nga mopuo ani kanila ilabi na kay mipalanog na ang Malakanyang og suporta ngadto sa ilang grupo. (jun.migallen22@gmail.com)