MGA atleta nga persons with disability (PWD) nga unta angayan hatagan og pagtagad gipaantus sa mga tig-classify sa 7th Philspada National Paragames.
Ang nahitabo, gipaadto pa sa mga playing venues nga unta pwede ra himuon sa eskuylahan sa Guiguinto National Vocational High School sa Bulacan ang classification diin sila gipapuyo.
Nakadayeg ko sa unang lakang sa Philspada nga usahon nalang ang puy-an sa mga atleta nga PWD aron mapasayon ang ilang kahimtang ug mag uban samtang ginapahigayon ang paugnat sa kusog.
Apan dako ang akong pagkadismaya kay gipaadto pa sila sa ilang mga playing venues nga kinahanglan mobiyahe pa og dul-an 30 minutos alang sa pagsuta o classification sa ilang kahimtang asang kategoriya sila angay padulaon.
Ang ubang mga atleta naggasto sa ilang kaugalingon nga kwarta kay walay suporta ang ilang LGU alang sa maong kalihukan.
Pwede ra unta kaayo himuon ang classification dinhi mismo sa eskuylahan aron dili na mahasul, apan igo nalang sila sa pagtuman kay-order man sa mga opisyal. Kamo daw hunahuna, tama ba ni?
Ang pag-apil sa Philippine National Team sa mga dula kay kuno ilang pangandam alang sa umaabot nga SEA Games apan apil mismo sa 7th Philspada Paragames nahimong bukid nga tungason alang sa mga deligasyon sa LGU kay wa gyod intawon silay dag-anan sa mga dula kay daw bugno sa kanding kontra kabaw ang nahitabo sa wheelchair basketball.
Gikasab-an kuno sa coach ang iyang player nganong gipa-iskor paman ang iyang gi-gwardiyahan kay ang ilang tumong nga zero-han ang kaatbang.
Nakaingon ko walay dungog ang ilang kadaugan kay ang team sa Davao City siyam lang, samtang ang National Team kapin 70 kay layo kaayo ang ilang kahimtang gikan sa training ug mga gamit nga wheelchair.
Pipila ka wheelchair sa taga Davao na-disqualify kay wa ka pasar sa standard tungod sa kalisud. Mao sab ang nasinatian sa uban.
Sa akong kaugalingon nga opinyon, dapat ilang gitugotan nga magdula ang mga players sa LGU nga sila-sila lang diin ang mahimong champion maoy ilang kalabanon alang sa exhibition game.
Ang National Team mga magdudula mga gipili gikan sa mga maayong player sa tibook nasud aron maoy iharang sa International competiton.
Sa miaging mga tuig didto ni sila ginapadula sa LGU diin sila migikan apan karon gidid-an aron ila kuno masolo ang kadaugan.
Tungod ini, daghang LGU ang naghunahuna nga dili na magpadalag team sa basketball kon mao lang gihapon ang sistema kay bisan tansan nga medalya di gyod sila makadala.