PIKIT, North Cotabato -- Naniudto og bala ang mag-amahan sa pagpamusil nga natigayon sa probinsiya sa Cotabato.
Giila ang nakabsan sa kinabuhi nga si Fortunato Nadela Jr, 40-anyos, minyo ug ang pagka-angol sa iyang usa ka tuig pa ang pangedaron nga anak nga babaye.
Sumala kang Pikit chief of police Major Mautin Pangandigan nga alas 12:20 sa udto niadtong adlaw nga Martes, Mayo 28, duha ka wala mailhing tawo ang misulod sa balay ni Nadela sa Barangay Takepan, Pikit ug gipusil kini gamit ang kalibre .45 nga pistola.
Abtik sab nga miikyas ang mga suspetsado sakay sa motorsiklo nga walay plaka paingon sa hilit nga dapit sa Pikit.
Patay on the spot ang biktima nga naka-angkon og pito ka samad pinusilan sa nagkadaiyang parte sa iyang lawas.
Samdan sab ang anak nga babaye ni Nadela nga usa pa lamang ka tuig ang pangedaron nga naigo sa iyang wala nga abaga sa saag nga bala nga gidala dayon sa Cruzado Medical Hospital sa Pikit.
Natumbok na sa pamilya sa mga biktima ang mga tawo nga dunay kalabutan sa hitabo nga gitakda nilang pasakaan og kaso.
Sa kasamtangan, ang kapulisan sa Pikit ang padayon nga nag-imbestiga sa pagpamusil sa mag-amahan. (EEF)