NIUBAN ang mga kanhi tiggamitan og ginadiling drugas sa mga tinun-an sa Duangan Elementary School uban sa ilang mga magtutudlo ug ginikanan ug ubang mga miboluntaryo sa pagpananom sa dili momenos 3,500 ka mga kahoy sa bukirang barangay sa Pinamungahan.
Natanom nila ang mga kahoy nga Panglomboien, Kaymito ug Nangka uban sa mga kawani sa Solid Earth Development Corp. (SEDC) nga mipahigayon sa maong kalihukan sa pagpadako og mga kahoy ug miandam sa mga linuyong.
Lakip sa mga miboluntaryo ang mga opisyales sa Duangan pinanguluhan ni Kapitan Annette Navarro, mga lider sa kabatan-onan sa komunidad, mga pulis ug mga kawani sa LNC Ventures nga tigpadagan og mga trak.
Unang nananom ang samang mga tinun-an pagka-Nobyembre 2017 didto Duangan uban sa ilang mga kapamilya og 3,500 ka mga kahoy uban sa ilang mga katugbang sa Guimbawian Elementary School, matod sa nagpasiugdang si Eng’r. Joel A. Sombelon.
Gipasiugda sa SEDC ang pagpananom sa maong dapit, asa dugang pa kining mopahigayon og susamang kalihukan, sa dili pa sugdan niini ang pagmina og mga minerales alang sa paghimo’g semento didto sa planta sa Taiheiyo Cement Philippines, Inc. (TCPI).
Napahigayon sab niini ang pipila na ka mga medical mission alang sa mga lumolupyo sa maong dapit sukad 2013, mibutyag si Sombelon, kinsa mao usab ang mine environmental protection and enhancement officer sa SEDC.
Sa milabay nga 10 na ka tuig, nakapananom ang SEDC uban sa TCPI og kapin 65-mil na ka mga kahoy sa silingang barangay sa Bugho, Cabatbatan ug Magsico sa San Fernando asa kini tigminahan ug nagpabalik sa mga nakawtan nga yuta ngadto sa kakahoyan aron pagpalambo sa kinaiyahan. (PR)